MANERA.az "Azərbaycan qəzəli" layihəsində "Müasir Əruz Klubu"nun (Əruz Xanəgahı) üzvü Cəsur Narinin (Seyyid Ümmi) qəzəllərini təqdim edir:

***
Gəl gülüm ta ki mən əğyarə gülüm sonra ölüm
Gəl gülüm ta ki mən əğyarə gülüm sonra ölüm

Son nəfəsdə qədəmin səcdəsinə kaş ya Sin
Mim tək qismət olaydı bükülüm sonra ölüm

Yediyim dərd olub ömrüm boyu gəl süfrəni aç
Nuşcanlıqla iki loxma bölüm sonra ölüm

Yer üzündə görüm haqqın zəfərin ya Rəbbim
Qalmasın ta ki nə zalim nə zülüm sonra ölüm

Can verəndə başımı al dizin üstə nə olar
Gözlərimdən könül istər öpülüm sonra ölüm

Darə çək dərimi soy nəşimi yandır kütlə
Ta ənəlhəqq edə zikr külüm sonra ölüm

Öncə kəşfiyyat aparmaq yolu öyrənmək üçün
Mütləq ey Ümmi gərək əvvəl ölüm sonra ölüm


***
Ara xəlvət gecə bir saqiyü bir sağərdir
Bir məni-qəmzədəyəm bir gülərüz dilbərdir

Qaş kəman kiprigi ox saçı kəmənd ey könlüm
Nazı tor aşiq üçün qəmzə iti xəncərdir

Kimi mə'şuq hüzurunda bula qanə bular
Eşq ayırmaz bu müsəlmandı ya ki kafərdir

Bilmirəm qeybi vəli paklərin söylədiyi
Nə ki var cəm' olub dövrə yəqin axərdir

Yarə al canımı ver busə dedim güldü dedi
Olmaz olmaz bu yaraşmaz mənə ki alvərdir

Gedirəm yar dedi xatirə bir şey qala ver
Dedim ancaq olanım bax bu qələm dəftərdir

Vəhy ilə şe'r qatıb zatıma Həq bal yağ tək
Babam Allah rəsulu Ümmi atam Heydərdir

Əliağa Vahidə nəzirə

Bilseydi kaş könül ki nə divanəlikdədir
Əqlə xəyalə sığmayan əfsanəlikdədir

Ey xam gözüylə gördüyünün eybin axtaran
Qəlbin öz eybinə niyə biganəlikdədir

Məstlik həqiqi varımın əvvəlki halıdır
Sərxoşluğum nə bəng nə peymanəlikdədir

Zahirdə dinə bağlılığım məkrü hiylədir
Könlüm həvəslə məstiyü rindanəlikdədir

Əqlin dağıtdı eşq əli abad ölkəsin
İndi xəyal xəzinəsi viranəlikdədir

Yarım soruşsa aşiqini hardadır deyin
Dünyayə gəldiyi xarabaxanəlikdədir

Ustad buyurdu Ümmiyə nöqsanlı qalma çox
Eşqin təmam nəşəsi məstanəlikdədir


***
Biz nicat tapmaq üçün möcüzə baş verməlidir
Başsızıq rəhm eləyib Həq bizə baş verməlidir

Dolanım başına saqi məni sərməst eylə
Yar ilə ilk görüşüm üz-üzə baş verməlidir

Bir günəş doğmalıdır qeyb üfüqündə bu zühur
Gecə tən olduğu vaxt gündüzə baş verməlidir

Hər bir imkanlı şükr etmək üçün Xaliqinə
Salamı endirərək acizə baş verməlidir

Eşqə zor yox vəli bu rəsm könüllü olaraq
Kimə yar etsə nəzər göz süzə baş verməlidir

Ümminin ya əcəli ya nəsə bir şey axir
Çatıb əmniyyəti yüz faizə baş verməlidir


***
Din ü imanımızın cani-cəhan oğrusudur
Saçının hər teli bir ruhi-rəvan oğrusudur

Qanlu qarətçi gözü yolkəsən azğın yerişi
Şivəsi huş aparan qəmzəsi can oğrusudur

Gecələr gözləyirəm ömrlər ötdükcə yolun
Beli əyri qocanın bəxti cəvan oğrusudur

Vüsal ümmidi ilə qol qanad aç uyma könül
Ayrılıq dərdinə ki tabü təvan oğrusudur

Hara getsən belədir qaidə dünyadə bu gün
Şəhərin qazisi həm eyni zaman oğrusudur

Başımız qatdı fələk varımızı soydu tamam
Nə sayaq indi filan ya ki filan oğrusudur

Zahirən türk kimi çapqınçı ədəbsiz Ümmi
Batinən məkrli arsız Xorasan oğrusudur


***
Saçlarının hər teli ey canımın cövhəri
Bir düyünə bənd edər xalına min müştəri

Bənd könül olmamış bəndəlik et sidq ilə
Ver başını saqiyə al yerinə sağəri

Nəqd bu meyxanədə badə içim nisyədir
İstəmirəm Zəmzəmi istəmirəm Kövsəri

Badə için rəngini üzdə nümayan edər
Kafər edər mömini mömin edər kafəri

Ey üzümün danəsi salxımını tərk elə
Mey küpünün vəhdətin bilmək üçün gəl bəri

Mey mən ü bədməst mən saqi mənəm badə mən
Mən elə bir varlığam yoxdur onun bənzəri

Ümmiyə mən ad verib Zöhrəni qıldım kəniz
Harut ilə Marutu eyləmişəm çakəri


***
Axşam şərabsatanə dedim pirəm ey oğul
Qalsam ümid var ki ola indi yoxdu pul

Xəlvətdə ver içim çıxım aşkarə məstü məst
Bir iki gözümə görünə ta ki sağ sol

Bədməst məstlərçün elə sirr açmışam
Açmaz bir ümmət üçün onu bil ki bir rəsul

Sufi dəgişdi xirqəni fətva libasinə
Eşşək həmindi amma ki zərbəft oldu çul

Qız alsa da babam onu verdi təlaqini
Bir qeyrisin bəyənmədi bu qarı qaldı dul

Ey dost ataq kənarə bu mənlik hicabini
Başdan ayağa eşq ilə məmlüvv həqq ol

Yar ilə üzbəüz oturan dəm bu aşiqi
Cənnət cəhənnəmin eləməz heç birin qəbul

Eşq eylədi həlalımızı sehr ilə həram
Bu yerdə karə gəlmədi əxbarü fiqh üsul

Quldarlıq eylədi çoxu çox şükr Ümmini
Quldurluq üstə tutdular axir ki oldu qul


***
Təvafi-Kə'bədən məqsəd cəmalindir cəmalindir​
Ənisim munisim yarım xəyalindir xəyalindir

Məni cəzb eyləyən eşqə degil məsciddəki mehrab
Bu qətlim qəsdinə durmuş hilalindir hilalindir

Əgər bir qəmzə peykani vurub tökmək dilərsən qan
Vur ey dilbər​ tök ey dilbər​ həlalindir həlalindir

Fəna səhrasın aşiqlər gəzir biçarə-biçarə​
Bəqa mülkündədir çarə vüsalindir vüsalindir

Büsati-eşqdə şahım Mühəmmədsən Mühəmmədsən(s)​
Cəsur Nari üzü qarə Bilalindir Bilalindir


***
Nə bəla gəlsə gülüm aşiqi-şeyda başına
Gələ bilməz o bəla qeyrinin əsla başına

Ey xoş ol məst ki bilməz qəmi-aləm nə imiş
Məst olarkən dolanır hər iki dünya başına

Kişi oldur ki sözüylə ola uyğun əməli
Fəqihin dəysin odur verdiyi fərva başına

Göz tək aç qəlbini canan gözü ilə nəzər et
Aşiqin nizədə gəl eylə tamaşa başına​

Bu müsəlmanlar açan zülmü Peyəmbər soyuna
Açmadı qövmi-yəhud bəlkə Məsiha başına

Əsrin alimlərinin pak edə bilməz birini
Yüz Xəzər bəhri qədər tök belə dərya başına

Meyin ətrini alıb zirzəmisindən Ümmi
Dolanır Kə'bə kimi bəs ki kəlisa başına


***
Gəl ey gözümün nuru bu gözlər səni gözlər
Yollarda qoyub getdigin izlər səni gözlər

Sən getmisən əfsus qalan bircə qəmindir
Sənsiz qəmini qəlbim əzizlər səni gözlər

Öz sirrini bir kimsəyə sənsiz deyə bilməz
Qəlbim bu təmiz sevgini gizlər səni gözlər

Gözlər yolunu həsrət ilə aşiq olanlar
Tək mən degiləm mən təki yüzlər səni gözlər

Səndən utanıb gizlənəcək əyri gəzənlər
Əmma nə qədər var isə düzlər səni gözlər

Gəl çat bizim imdadımıza ey son ümidmiz
Həsrətlə baxıb yollara gözlər səni gözlər

Məsum mələkim lütf elə gəl Narini dindir
Qəlbimdə qalan sevgili sözlər səni gözlər