Kənan Hacı yazır:

hava o qədər sakitdi ki,
söykənmək istəyirsən ona,
Tanrının qamçısı kimi
kürəyinə dəyən ağrıları
ovutmaq istəyirsən,
səni qarabaqara izləyən
ölümün üstünə üfürmək üçün
qəzəb körüyünün
təzə oksigenə ehtiyacı var...
hava o qədər sakitdi ki,
zaman bir anlıq dayanıb
nəfəsini dərir sanki...
pəncərəmdə ucu görünən ağacı
əlfəcim kimi həyat adlı kitabın
arasına qoyuram,
hadisələrin axarı
yaxşılığa doğru getmir hələ ki,
hava o qədər sakitdi ki...

24 avqust, 2015
1 saylı Şəhər Klinik Xəstəxanası