Manera.az Günel Rəcəbin şeirlərini təqdim edir:


Bir görüşün şahidi,
Son görüşün şahidi,
Mənim kimi ağlama.
Ağ dəsmalım, ağlama
İllərlə silmisən göz yaşlarımı.
Dərd ortağım, ağlama.
İndi onun yanında
Dayanmışıq ikimiz.
Cəsarətim çatmadı
Toxunum əllərinə.
Həyəcanlı bu anda
Səni sıxdım əlimdə.
Yar gözünə baxmağa
Mən utananda
Acı xatirələr tək
Açdım-bağladım səni.
Biz səssiz ayrılanda
Yenə sınadım səni.
Ağ dəsmalım, ağlama.
Yenə həmdəmim sənsən.
Yenə onsuz, kimsəsiz
Tənha və yalqız mənəm.

***

Həyatıma gəldin və getdin
Bir yel olub ötüb-keçdin
Saçlarımı dağıtdın
Günəş kimi doğmadan
Qara gecəyə döndün.
Ruhumu ovsunladın
Ayımı oğurladın.
Kor şairin sevgisi,
İşıqsız qoydun onu...

***

Ağ-qara filmimin
Rəngləri ol, gəl!
Bu səssiz ağlayan
Qəlbimin səsi ol, gəl!

Yolum yoxdur getməyə,
Bir qapını döyməyə,
Şeirimi deməyə,
Bir ünvanım ol da, gəl!

Sənsiz ruhum yarımçıq,
Cümləm, sözüm yarımçıq
Sətirlərə yol açıb,
Sən şeirim ol da, gəl!

Kor şair bir xəstə.
Ruhu şikəstə.
Bu son nəfəsdə
Nəfəsim ol, gəl!
Həzin bir musiqi
Havasındayam.
Bilmirəm dünyanın
Harasındayam.
Ya sənin yanında,
Lap yaxınında.
Ya lap uzaqlarda
Səndən xəbərsiz.
Olmur belə,
Sənsiz olmur.
Saatımın əqrəbləri
Yoxdur daha.
Içimdəki boşluğa
Sığa bilmir ümidlər.
Səndən mənə yadigar
Sınıq-salxaq ümidlər.
Bacarmıram.
O qədər həsrətəm,
Sevgilim, sənə
Sənin həsrətin də
Əzizdir mənə.
Səni düşünərək
Göz yaşı tökmək
Yeganə əyləncəm,
Tək həvəsimdir.
Özüm uydurduğum
Yetim xəyallar
Öz ünvanım,
Öz qəfəsimdir...

***

Qapının önündə sarı çiçəklər...
Bir adsız aşiqin hədiyyəsidir!

Sarı lalə ümidsiz bir eşqin nişanəsidir
Sarı akasiya platonik bir eşqin işarəsidir.
Sarı günəbaxan günəş deməkdir.
Sən mənim ayımsan, günümsən demək.
Sən mənim səsimsən, ünümsən demək.
Bitməyən sevgimin çıraqbanısan.
Bir bahar qoxulu yazımsan demək.
Mən sənsiz solmuşam, xəstəyəm demək.
Bəlkə də həsrətin ən açıq rəngi
Bəlkə də həsrətin çılğın səsidir.

Бесплатные шаблоны для 10.5Forex Портал для чайников