DOSTOYEVSKİYƏ MƏKTUB

Salam, köhnə dost!
Yerin üstündən yazıram sənə,
Sən yerin altında rahat yatırsan, yəqin,
Mənsə burada əcəllə qumar oynayıram.
Ya mənə verər Allah, ya ona.
Hansı cinayətimin cəzasıdır bu ömür,
Bilmirəm.
Gecələr bir yana,
Heç gündüzlər də
Gün üzü görmürəm.
Burada tək bəyaz olan şey
Həyatla mübarizədə qaldırdığımız bayraq,
Bir də saçlarımızdır.
Həyat sanki "Nalayiq lətifə"dir,
Nə bir düşündürücü tərəfi var, nə də gülməli.
Biz "Bədbəxt insanlar"ıq,
Nə vaxtsa xoşbəxt olmaq ümidilə yaşayırıq.
Nə isə, sağ ol! Görüşənədək.
Həə, bir də, yadımdan çıxmamış,
Tolstoya salam deyərsən;
Ona de ki, insan puç ümiddən başqa
Heç nə ilə yaşaya bilmir bu həyatda.

MANERA.AZ