Nizami Kino Mərkəzində Mədəniyyət və Turizm Nazirliyinin təşkilatçılığı ilə reallaşan “Söz” adlı ədəbi layihənin ilk təqdimatı keçirilib.

Tədbirdə layihənin rəhbəri Nigar Həsənzadə məqsədin Azərbaycanın klassik şair və yazıçılarının oxuculara daha yaxından tanıdılmasından ibarət olduğunu qeyd edib. Layihənin yeni gənc yazıçıların yetişməsində müstəsna rola malik olacağı diqqətə çatdırılıb.

Azərbaycan Yazıçılar Birliyinin sədri, Xalq Yazıçısı Anar sözün insan həyatında və ünsiyyətində xüsusi əhəmiyyətə malik olmasından danışıb. Xalq Yazıçısı ədəbiyyata və söz sənətinə marağın artırılmasına xidmət edən layihənin sonda müsbət nəticələnəcəyinə əminliyini ifadə edib.

Sonra Azərbaycan kinematoqrafiyasının şah əsərlərindən olan “Dədə Qorqud” filmindən fraqmentlər nümayiş olunub.

Tədbirdə Xalq Artisti Nurəddin Mehdixanlı, aktyorlar Hikmət Rəhimov və Mələk Abbaszadənin təqdimatında bir sıra klassik söz ustalarımızın qəzəlləri səsləndirilib.

Tədbir konsert proqramı ilə davam edib.