Qazaxda Molla Pənah Vaqifin 300 illiyi qeyd olundu

Qazaxda Molla Pənah Vaqifin 300 illiyi qeyd olundu

Qazaxda Molla Pənah Vaqifin 300 illiyi qeyd olundu
Beynəlxalq Muğam Mərkəzinin, Milli Kitabxananın və Milli Konservatoriyanın birgə layihəsi olan "Sirlər xəzinəsi"nin növbəti tədbiri Molla Pənah Vaqifin 300 illik yubileyinə həsr olunub.

Azərbaycan Respublikasının Prezidenti cənab İlham Əliyevin sərəncamı ilə respublikamızda böyük Azərbaycan şairi Molla Pənah Vaqifin 300 illik yubileyinə həsr olunmuş silsilə tədbirlər keçirilir.

MANERA.AZ xəbər verir ki, Mədəniyyət və Turizm Nazirliyinin, Qazax Rayon İcra Hakimiyyətinin dəstəyi ilə Beynəlxalq Muğam Mərkəzinin, Milli Kitabxananın və Milli Konservatoriyanın"Sirlər xəzinəsi" adlı layihəsinin Molla Pənah Vaqiflə bağlı tədbiri Qazax şəhərindəki Ədəbiyyat muzeyində gerçəkləşib. Tədbirdə respublika ictimaiyyətininnümayəndələri, elm adamları, şairlər, yazıçılar, poeziyasevərlər, KİV nümayəndələri iştirak ediblər.

Tədbir iştirakçıları əvvəlcə ulu öndər Heydər Əliyevin adını daşıyan parka gələrək abidəsi önünə gül dəstələri qoyublar, sonra Heydər Əliyev mərkəzində dahi şəxsiyyətin həyat və yaradıcılığı ilə tanış olublar. Yuxarı Salahlı kəndində M.P.Vaqifin və S.Vurğunun heykəlləri ziyarət edilib,S.Vurğunun Poeziya Evində qonaqlara böyük şair haqqında məlumat verilib.

Tədbiri giriş sözu ilə rayonun icra başçısı Rəcəb Babaşov açıb. Tədbirin aparıcısı, M.F.Axundzadə adına Azərbaycan Milli Kitabxanasının direktoru, professor Kərim Tahirov çıxış edərək keçirilən tədbirin məqsəd və əhəmiyyətindən danışıb.

Filologiya elmləri doktoru,professor Rüstəm Kamal, Azərbaycan Yazıçılar Birliyi Qazax filialının sədri, şair Barat Vüsal, Qarabağ filialının sədri, professor Ənvər Əhməd, AzərTAc-ın müxbiri, şairə Zərəngiz Dəmirçı Qayalı, şair Zaməddin Ziyadoğlu çıxış edərək Vaqifin yaradıcılığının xarakterik xüsusiyyətləri haqqında fikirlərini bölüşüblər.

İrəvan Dövlət Azərbaycan Teatrının aktrisası, filologiya üzrə fəlsəfə doktoru Zülfiyyə Eldarqızının ifasında tədbir boyu M.P.Vaqifin şeirləri səslənib. Milli Konservatoriyanın müəllimləri Firuz Səxavətin və Vüqar Əliyevin ifaları alqışlarla qarşılanıb. Gənc aşıq Samir Allahverdiyev Vaqif yaradıcılığından şeirlər söyləyib,sazda aşıq havaları ifa edib.