ELDAR İSMAYILOĞLU


Yarı yanmış qar şəkliyəm,
Gəl as, məni budağından.
Bir azdan günəş də gələr,
Kölgə düşür dodağından.

Hər gün payızı sevməkdi,
Hər baxış sənə vurulmaq.
Hər gün üz-üzə qaçmaqdı,
Həm yağış-yağış qırılmaq.

Yenə ağaclar danışır,
Ötən küləyə halını...
Qızıl nöqtələr gətirir,
Demə xəzan sualını.

Hər gün bir qadın kölgəsi
Asılır divarımızdan,
Mənə uzaq - uzaq...yaxın,
Gəlib ötür aramızdan...

Sinəmi yar, çıx, bənövşə,
Yaz inciyər çuxasında.
Şəkil - şəkil sevmə məni,
Bir qız ölür yuxusunda...

Manera.az