MANERA.AZ Vahid Aslanın şeirini təqdim edir:

İstərdim ki...

Elə bir şəhərdə

Yaşamaq istərdim ki,

Orada hər axşam yağışlar yağsın,

Nə xəyanətlər

Gözə dursun,

Nə günahlar dizə çıxsın,..

Orada bir muzey olsun,

Göz yaşları muzeyi.

Düşünsünlər ki,

Insanlar ağlayırmış

Bir zamanlar;

Orada bir heykəl olsun,

Aldanan ümidlər heykəli.

Orada hər gün imdad diləyənlərin

Göylərə uzanmasın əlləri;

Orada insanlar

Tanrısını

Göy üzündə axtarmasın,

Orada insanların

Tanrısı

Ürəyinin içində olsun...