Manera.az tanınmış şair Nazim Əhmədlinin 65 illiyi münasibətilə şeirlərini oxuculara təqdim edir:

Üzünü qoy sinəm üstə

üzünü qoy sinəm üstə,
gör səni necə yandırır;
ürəyim gündüz üşüyür,
həsrətim gecə yandırır;

gün addıyır, düşür gecə,
dəli sevgi bir işgəncə;
çınqısı çatıb indicə
hələ təzəcə yandırır;

bu dərd mənə gəldi, kimnən,
qaçdım loğmannan, həkimnən;
alovu qalxır içimnən,
məni gizlicə yandırır;

bilmədim nə sirr eliyib,
qovub lap yesir eliyib;
könlümü əsir eliyib,
dərd içə-içə yandırır;

mən dəli sevda adamı,
həsrət qırıb inadımı;
sındırıb qol-qanadımı,
doldurub peçə yandırır;

ağ buludlar lələk-lələk,
ruhum bir adsız kəpənək;
ömrümüzü çərxi-fələk,
yandırır, heçə yandırır.

dünya bir yarpaq boydadı

ürəyimə bir səs düşüb,
bilmirəm, bu nə səsdi, nə;
qönçələr təzə doğuldu,
küləklər durub qəsdinə;

yaz gəldi, sular qaynadı,
göydə ulduzlar oynadı;
dünya bir yarpaq boydadı,
biz də qonmuşuq üstünə;

say görüm, dərdin neçədi,
ömrün bir yanı gecədi;
ürəyim sapdan incədi,
bir də, könlümü küsdürmə;

ötən günləri saymışam,
ruhumu söz-söz oymuşam;
bir dəstə çiçək qoymuşam,
həsrətin soyuq büstünə;

ütülürəm, ütüm-ütüm,
hara gedim, harda itim;
alışdırıb hara getdin,
gəlib baxarsan tüstümə.

Silkələmə nar ağacın

göy üzündən ağca bulud,
yelkənin bağlar üstümə;
silkələmə nar ağacın
narı dağılar üstümə;

həsrətim əsir dağlara,
ruhum tələsir dağlara;
üz tutsam əsir dağlara,
bulaqlar ağlar üstümə;

bu dünya dar bir qalacıq,
ürəyim gül kimi açıq;
üzüm güləndə azacıq,
cumar paxıllar üstümə;

yazın yaşılca çağında,
boylu qönçələr doğumda;
gecə qarışıq yuxumda,
yeriyir dağlar üstümə;

qaçdm, bağladım gözümü,
çınqıl qanatdı dizimi;
atım səngərə özümü,
gəlir yağılar üstümə;

dəli rüzigar mənə gəlir,
gəlir də, hər sənə gəlir;
düzünə, tərsinə gəlir,
qarlar, sazaqlar üstümə;

ütdüm günləri, ayları,
o tayları, bu tayları;
dünyanın dəli çayları,
dönüb axırlar üstümə;

kimin yarıdı, bu vətən,
kimnən yarıdı bu vətən;
ey gözəl Allahım, nədən,
dərdi yıxırlar üstümə.

Yazın havası ayrıdı

yazın havası ayrıdı,
yazı yağışdan bilirəm;
nazını gizlədən gözəl,
nazı baxışdan bilirəm;

ruhumu bir səsdi içir,
könlümü həsrətdi, biçir;
sevgi bir istəkdi, keçir,
ömrü naxışdan bilirəm;

ürəyimdə acı su var,
dərdin qardaş-bacısı var;
yolun ağrı-acısı var,
yolu yoxuşdan bilirəm;

yarpağı qatdıyır payız,
içimi odduyur payız;
yay gedir, addıyır payız,
yaz gəlir, qışdan bilirəm;

ağ duman telimə dönüb,
hər qarış ölümə dönüb;
dünya qan gölünə dönüb,
qanı qarğışdan bilirəm;

bu bəşərin qəsdi nədi,
bir-birinin qəsdinədi;
dünya məzar üstündədi,
dərdimi daşdan bilirəm.

Səni mənə verən Allah

səni mənə verən Allah,
məni də sənə yaradıb;
səni də qatıbdı mənə,
elə bir günə yaradıb;

ürəyini qoşub sözə,
əllərini basıb közə;
dumanı göndərib düzə,
dağları çənə yaradıb;

götür-qoy eləyib, yenə
fikirləşib, dönə-dönə;
gözəlliyi verib sənə,
sevməyi mənə yaradıb;

arzusuna, məramına,
dərgahına, irəminə;
şükür olsun kərəminə,
yaxşı ki, yenə yaradıb.

Sənsizlik ağır işgəncə

yamac boyu düzülübdü,
ağ qönçələr incə-incə;
ağ çiçəklər doğulacaq,
doğulacaq sən gəlincə;

sən gəlincə könül naçar,
gözdərimnən yuxu qaçar;
üstümə ağ yelkən açar,
ağ bulutdar çəngə-çəngə;

kim baxır ağrıya, aha,
gəlib batmışıq günaha;
uzaq yollar dönməz daha,
uzaq yollar döngə-döngə;

göynüyür bağrımın başı,
ötüb həsrətimin yaşı;
sənsizlik bir yol yoldaşı,
sənsizlik ağır işgəncə.

Bir gün mən də bulud olum

bir gün mən də bulud olum,
göy üzündən baxım sənə;
sonra qaralım, bozarım,
guruldayım yağım sənə;

əllərini uzat göyə,
yağma-yağma deyə-deyə;
mən də qoşulum küləyə
toxunsun ayağım sənə;

sonra dönüm işıq olum,
baxım sənə, aşiq olum;
yaşıl bir sarmaşıq olum,
dolansın budağım sənə;

bir az saral, bir az da sol,
bir az kövrəl, bir az da dol;
sonra bir şirin bulaq ol
qurusun dodağım sənə.

Dəli aşiq nə dersən de

dəli aşiq nə dersən de,
dərdin üzü gülmədi heç;
dünyanın yolları uzun,
gedən yollar dönmədi heç;

bulud gəldi, oynaxladı,
Göyün göyüzü laxladı;
anam dağları ağladı,
göz yaşını silmədi heç;

tay mənə şeir oxuma,
həsrət qarışıb ahıma;
bulaqlar girdi yuxuma,
dağlar özü bilmədi heç;

dərd dediyin bir pətəkdi,
dağıldı, üstümə səkdi;
ayrılıqlar uzun çəkdi,
ayrılıqlar ölmədi heç.

Ürəyimdə bir söz qalıb

Ürəyimdə bir söz qalıb,
gəl, səni agah eyliyim;
tellərini sər üzümə,
öpüm, qibləgah eyliyim;

yolu keçirdim, yarıdan,
pörşüləndim, sən sarıdan;
gəldim ki, səni yarıdam,
gəlmədim, günah eyliyim;

ocağın közün döndərim,
könlümün gözün döndərim;
fələyin üzün döndərim,
dərgahına ah eyliyim;

ötən dərdi kim araya,
ağ saçı büküm qaraya;
gedim çıxım, bir saraya,
özümü padşah eyliyim;

kür ruhumdan qopum yenə,
gəlim, çalım-çapım yenə;
səni hardan tapım yenə,
özümə ürcah eyliyim.

Baxıram gündüzün qürub çağına

Baxıram gündüzün qürub çağına,
Günəş aşırımda yarıcan qalıb;
qırmızıya çalır sarı buludlar
yarı ilik qalıb, yarı qan qalıb;

ötən yaddaşımı dərib göy üzü,
ruhumu üstünə sərib göy üzü;
o uzaq göy üzü, qərib göy üzü
yarı gecə qalıb, yarı dan qalıb;

dərdi sıxcalasan suyu da çıxmaz,
çağır, Məlikməmməd quyudan çıxmaz;
dünyanın qışı da, yayı da çıxmaz,
ömür yarı gedib, yarı can qalıb;

nə tez payız gəldi, nə tez qış oldu,
illər qanadlanıb nə tez quş oldu;
bütün sevgilərin kökü yaşıldı,
bütün ayrılıqlar sarıdan qalıb;

yağıb sellənib də axıb getmişik,
dərdi, intizarı yığıb getmişik;
hansı cəhənnəmə çıxıb getmişik,
dağlar arxamızca pərişan qalıb.


***
daha yorulmuşam, bəsdi danışdım,
nə başım işləyir, nə çənəm daha;
soyuqdu, ovcuma qoy əllərini,
bəlkə bir azacıq isinəm daha;

üzülüb dağlar da, ahından düşüb,
dünya aralanıb oxundan, düşüb;
dəli-doluluğum tağından düşüb,
sən mənə deməzsən bir dənəm, daha;

gətirin, tez tutum xonça buluddan,
göndərim dağlara boğça buluddan;
başıma qar yağıb ağca buluddan,
gedib yuxumdan da o sənəm, daha;

bu eşqə nə naxış, nə ilmə düşmür,
könlüm hər istəyin felinə düşmür;
elə axtarıram əlimə düşmür,
şəlalə saçların, tər sinən daha.

bir aldın canımı, bir də al, görüm,
çəkib kəməndinə bir də sal, görüm;
gözümün önündə bir xəyal görüm,
nə ruham, nə də ki, bədənəm daha;

yüz il papağımı günə vermişəm,
ömrümü dumana, çənə vermişəm;
indi söz deməyi sənə vermişəm,
mənə nə deyirsən, sən denən daha.

Təqdim etdi: Tural Adışirin
MANERA.AZ