Ölüm nədir? - Yorğunluğun sonu, istirahətin başlanğıcı. |Tək cümləlik fəlsəfə- LAYİHƏ
Manera.az-ın “Bir daşla doqquz quş” layihəsində bu dəfə suallara Azvision.az-ın baş redaktoru Vüsal Məmmədov cavab verir:
Niyə varsan?
- Məndən asılı deyil, kainatda əbədi gedən maddənin və enerjinin şəkildən-şəklə düşməsi prosesinin tərkib hissəsiyəm.
Niyə yox olacaqsan?
- Maddə yox olmur, şəklini dəyişir; informasiya tərəfimin isə lazım olan qismi genlərimlə sonrakı nəslə ötürüləcək, lazım olmayanı da elə itsə, yaxşıdır.
Niyə yazırsan?
- Bacardığım odur.
Yaşamaq nədir?
- Təkamül prosesinin bir epizodunda rol oynamaq.
Ölüm nədir?
- Yorğunluğun sonu, istirahətin başlanğıcı.
Ədalət nədir?
- Başqalarının da maraqlarını nəzərə almaq.
Azadlıq nədir?
- İnsana qadağaları onun özünün qoyması.
Yaradıcılıq nədir?
- Yaradıcılıq yoxdur, rekonstruksiya var, artıq mövcud olanları fərqli şəkildə düzüb-qoşmaq var – “Lego” konstruktoru kimi.
İnsan kimdir?
- Allahı yaradan qüvvə.
Tural İsmayılov,
MANERA.AZ