[u][b]ƏhmədQəşəmoğlu
Əhməd Qəşəmoğlu

***
günəşin özü şeir deyil hələ,
şeir onun istisidi, işığıdı.
dənizin özü şeir deyil hələ,
şeir onun nəfəsidi, nəğməsidi.
sevgilimin özü şeir deyil hələ,
şeir onun ilqarıdı, vəfasıdı...
xəyallarım bulud-bulud
taleyimin dünyasında –
şeir onun şimşəyidi.
dərin suların dibindən
qaynayıb qalxan bulaq şeirdi...
sən yazmasan,özü gəlsə,
yeni dünyalar gətirsə,
səni də heyran eyləsə,
şeirdi.
söz işığa bələnəndə,
çiçəkləyəndə
haqqın özündən gələndə, şeirdi.
dünyanın içi ilə yeriməyə nə var ki,
dünya sənin içinlə yeriyəndə
şeirdi.