Mayın 5-də Oğuz şəhər E.Abdullayev adına 2 nömrəli texniki və təbiət fənləri təmayüllü liseydə Azərbaycan Yazıçılar və Jurnalistlər Birliklərinin üzvü, Prezident təqaüdçüsü şair, yazıçı, publisist Nazim Hüseynli ilə görüş keçirilib.

MANERA.AZ xəbər verir ki, tədbiri liseyin direktoru Qəmzə Süleymanova açıb.

Məktəb uşaq birliyinin rəhbəri Əsmər Sərkərova Nazim Hüseynlinin həyat və yaradıcılığı barədə şagirdlərə məlumat verib.

Şagirdlərin ifasında müəllifin bu il “Elm və təhsil” nəşriyyatında çap olunmuş “Hamıdan da Vətən üstün” kitabından şeirlər səsləndirilib.

Liseyin təşkilatçısı Seymur Kərimov, şəhid bacısı Şükufə İbrahimova çıxış edərək Şanlı Zəfərimizə, şəhidlərimizə həsr olunmuş belə kitabların şagirdlərin, gənclərin vətənpərvər ruhda böyüməsinə təsirindən danışıblar.

Nazim Hüseynli çıxış edərək şagirdlərin dünyagörüşünün formalaşmasında, nitqinin inkişafında mütaliənin, bədii ədəbiyyatın rolundan danışıb,
şeirlərini oxuyub, şagirdlərin suallarını cavablandırıb və bədii yaradıcılıqla məşğul olmaq istəyən şagirdlərə tövsiyələrini verib.

Sonda müəllif kitablarını imzalayaraq məktəbin kitabxanasına və fəal şagirdlərə hədiyyə edib.