Bakı Şəhər Mədəniyyət Baş İdarəsinin Yasamal rayon MKS-nin Mərkəzi Kitabxanasında uşaq yazıçısı, publisist Gülzar İbrahimova ilə görüş keçirilib.

MANERA.AZ xəbər verir ki, əvvəlcə tədbir iştirakçıları kitabxanada təşkil edilən uşaq ədəbiyyatı sərgisi ilə tanış olublar.

Tədbirdə G.İbrahimovanın həyat və yaradıcılığı haqqında geniş məlumat verilib. Bildirilib ki, Azərbaycan Yazıçılar Birliyinin və Azərbaycan Jurnalistlər Birliyinin üzvü Gülzar İbrahimovanın çağdaş ədəbiyyatımızda özünəməxsus yeri var. O, istedadlı bir nasir kimi, uşaq ədəbiyyatı aləmində “Gülzar nənə” təxəllüsü ilə tanınır.

Görüş zamanı Gülzar İbrahimova iştirakçılara öz şeirlərini səsləndirib, oxucuların fəal iştirakı ilə maraqlı interaktiv, əyləncəli oyunlar keçirib.

Ayxan Qafarlının, Firuzə Zeynalovanın, Ziya Nəzirlinin və Aqil Əmirlinin söylədiyi şeirlər tədbiri daha da rəngarəng edib.

Sonda Gülzar İbrahimova tədbir iştirakçılarına müəllifi olduğu “Ciddi ol!” yumorlar kitabını və “Sehirli dünya” jurnalının sonuncu nömrəsini hədiyyə edib.