Həsənağa Turabovun vəfatından 14-il ötür./MANERA.AZ

Bu gün Azərbaycan mədəniyyətinin görkəmli siması,teatr və kino sənətinin əvəzolunmaz aktyoru,Xalq artisti Azərbaycan SSR Dövlət mükafatı laureat,"Şöhrət" ordeni laueratı, Həsənağa Turabovun anım günüdür.Həsənağa Turabovun vəfatından 14 il ötür

Qeyd edək ki,Həsənağa Turabov 1938-ci il 24 martda Bakı şəhərində anadan olub. 31 saylı orta məktəbdə təhsil alıb. Orta məktəbi bitirdikdən sonra Azərbaycan İncəsənət İnstitutuna daxil olub və 1960-cı ildə aktyorluq ixtisası üzrə ali təhsilini başa vurub. Elə həmin ildən Azərbaycan Dram Teatrında aktyor kimi fəaliyyətə başlayıb və ömrünün sonuna qədər bu teatrda çalışıb. 1987-2001-ci illərdə teatrın direktoru və bədii rəhbəri vəzifələrində işləyib. Onun rəhbərliyi dövründə teatr əsaslı təmir edilmiş, neçə-neçə klassik və müasir əsərlər səhnəyə qoyulub.

Səhnə fəaliyyətinə başladığı ilk illərdən lirik-psixoloji üslubu ilə seçilib, Azərbaycan və dünya dramaturqlarının əsərlərində baş rolları ifa edib.Bunlardan Vahid ("Kəndçi qızı"), Azər ("Yaxşı adam"), Hamlet ("Hamlet"), Lionel ("Orman qızı"), İsgəndər ("Ölülər") Xəyyam ("Xəyyam") xüsusilə seçilir.

Həsənağa Turabov bir sıra bədii filmlərdə, o cümlədən, televiziya filmlərində maraqlı və yaddaqalan surətlər yaradıb. "Yeddi oğul istərəm" filmindəki Gəray bəy obrazı onun ən yaddaqalan rollarındandır. Onun digər bir yaddaqalan rolu "Babək" filmində yaratdığı Afşin roludur. Həsənağa Turabovun "Axırıncı aşırım", "Çarvadarların izi ilə", "Ürək... Ürək...", "Sevinc buxtası", "Dantenin yubileyi", "Qəm pəncərəsi", "Bəyin oğurlanması" və başqa filmlərdəki rolları da öz ifa tərzilə seçilir. "Qanlı zəmi" filminin isə rejissoru olmuşdur. Onun son çəkildiyi filmlər isə Rüstəm İbrahimbəyovla Ramiz Həsənoğlunun "Ailə" və Eldar Quliyevin "Nə gözəldir bu dünya..." filmləri olmuşdu.

Azərbaycanın görkəmli rejissoru Tofiq Kazımov və Həsənağa Turabov

Həsanağa Turabov hər zaman dövlət tərəfindən dəyərləndirilmişdir müxtəlif vaxtlarda fəxri ad,orden və mükafatlarla təltif olunmuşdur.

Eyni zamanda H.Turabov Azərbaycan Dövlət Mədəniyyət və İncəsənət Universitetinin professoru kimi pedaqoji fəaliyyəti də səmərəli olub. O, zəngin təcrübəsinə əsaslanaraq, gənclərin bu nəcib, eyni zamanda mürəkkəb sənətin incəliklərinə yiyələnməsi və Azərbaycan teatrının ənənələrini davam etdirə biləcək sənətkarların yetişdirilməsi işində əlindən gələni edib və bir çox tanınmış aktyorlar xalq və əməkdar artistlər Həsənağa Turabovun tələbəsi olublar.

Həsənağa Turabov 2003-cü ildə qəflətən vəfat etmişdir. "Qurd qapısı" qəbiristanlığında oğlu Daşqının yanında torpağa tapşırılıb.