Şahin Sərdarlı

Bir payız sevdası

Gözü yaşlı qalma, payız,
Göz yaşını siləmmərəm.
Yarpağımı salma, payız,
Mən saçını kəsəmmərəm.

Söylə mənə, hara gedir,
Qocalmış ayaq izləri.
Zədələnir ayaqlarım,
Qalır daş-qalaq izləri

Məni belə sevmə, payız,
Əriyərəm, dözəmmərəm.
Tək telini yerdə görsəm,
Addım atıb gəzəmmərəm.

Nərə çəkib, silkələyir,
Biz xəzana boyanırıq.
Yəqin, gəlib söhbət edir,
Kəlmə-kəlmə islanırıq!

Dərdə düşsəm, dinmə, payız,
Mən bu dərdlə öləmmərəm.
Leyli kimi sevsən, məni,
Kor gözümlə görəmmərəm!

İməkləyib addım atıb,
Qanad açıb, uça bilsəm.
Şahin olsam, havalarda,
Sınaqlardan keçə bilsəm.

Arzuları alma, payız,
Qanadlarım qırılmasın.
Dilə dişə salma, payız,
Saçlarım da ağarmasın.

MANERA.AZ
Бесплатные шаблоны для 10.5Forex Портал для чайников