manera.az
manera.az

“Qobustan”dan “Molla Nəsrəddin”ə – 120 ilin ədəbi yaddaşı

📅 18.11.2026 13:00

“Qobustan”dan “Molla Nəsrəddin”ə – 120 ilin ədəbi yaddaşı
Azərbaycanın iki mötəbər ədəbi-mədəni nəşrini bir araya gətirən xüsusi buraxılış ictimaiyyətə təqdim olunub.

Noyabrın 16-da Azərbaycan Yazıçılar Birliyində (AYB) “Qobustan” jurnalının “Molla Nəsrəddin” jurnalının 120 illiyinə həsr edilmiş xüsusi buraxılışının təqdimatı keçirilib.

Ədəbi və elmi ictimaiyyətin tanınmış nümayəndələrini bir araya gətirən tədbir milli mətbuat tariximizin zəngin irsinə, mollanəsrəddinçilik ənənələrinin müasir dövrdə aktuallığına və ədəbi nəsillər arasında varislik məsələlərinə həsr olunub.

Təqdimat mərasimini giriş sözü ilə açan AYB sədri, Xalq yazıçısı Anar “Qobustan” jurnalının Azərbaycan mədəniyyəti və ədəbiyyatı tarixindəki özünəməxsus mövqeyindən danışıb. Bildirib ki, jurnal yarandığı gündən milli mədəniyyətin, incəsənətin və ədəbiyyatın təbliğinə, istedadlı gənclərin üzə çıxarılmasına mühüm töhfələr verib.

Xalq yazıçısı nəşrin müxtəlif dövrlərdə görkəmli yaradıcı şəxsiyyətlərin əsərlərinin, fikir və mülahizələrinin oxuculara çatdırılmasında mühüm rol oynadığını vurğulayıb, “Qobustan”ın öz ənənələrinə sadiq qalaraq bundan sonra da Azərbaycan mədəniyyətinə töhfələr verəcəyinə əminliyini ifadə edib.

Mirzə Cəlilə yenidən qayıdış

AMEA-nın prezidenti, akademik İsa Həbibbəyli çıxışında “Molla Nəsrəddin” jurnalının milli ədəbi-bədii fikrin, ictimai şüurun və azərbaycançılıq ideyalarının inkişafındakı tarixi rolundan bəhs edib.

Akademik nəşri Azərbaycan tənqidi realizminin beşiyi kimi səciyyələndirərək mollanəsrəddinçilik ideyalarının bu gün də öz aktuallığını qoruduğunu bildirib. O, xüsusi buraxılışın təqdimatını Mirzə Cəlil yaradıcılığına yenidən qayıdışın ifadəsi kimi qiymətləndirib.

İsa Həbibbəyli “Qobustan” jurnalının müxtəlif sənət istiqamətlərini, fərqli ədəbi nəsilləri və yaradıcı düşüncələri bir araya gətirən platforma olduğunu diqqətə çatdırıb. Nəşrin uzun illər ərzində qazandığı nüfuzun qorunmasında onun redaktorlarının və yaradıcı kollektivinin xidmətlərini xüsusi qeyd edib.

Bir əsri aşan sözün gücü

Azərbaycan Respublikası mədəniyyət nazirinin müavini Fərid Cəfərov “Molla Nəsrəddin” jurnalının milli mətbuat, ədəbiyyat və ictimai fikir tariximizdə dönüş nöqtəsi olduğunu bildirib.

Onun sözlərinə görə, jurnalın xalqın gündəlik həyatından qaynaqlanan məsələlərə müraciət etməsi, aktual mövzuları sadə və anlaşıqlı dillə təqdim etməsi nəşrin ictimai təsir gücünü artıran əsas amillərdən olub.

Nazir müavini yubiley münasibətilə Mədəniyyət Nazirliyi tərəfindən həyata keçirilən tədbirlərdən, jurnalın irsinin qorunması, araşdırılması və geniş ictimaiyyətə çatdırılması istiqamətində görülən işlərdən danışıb. O, “Azərbaycan mədəniyyəti – 2040” Mədəniyyət Konsepsiyasında ədəbiyyatın və Azərbaycan dilinin inkişafına xüsusi diqqət yetirildiyini də vurğulayıb.

Ədəbi yaddaşdan yeni nəslə

Tədbirdə Xalq rəssamı Arif Hüseynov, Xalq yazıçısı Çingiz Abdullayev, professor Asif Rüstəmli, Xalq artisti Ramiz Həsənoğlu, AYB katibi Səlim Babullaoğlu, filologiya elmləri doktoru Gülbəniz Babayeva və digər iştirakçılar çıxış ediblər.

Çıxışlarda Cəlil Məmmədquluzadənin və mollanəsrəddinçilərin yaradıcılıq irsinin müasir əhəmiyyətindən, jurnalın milli-mənəvi dəyərlərin və ictimai düşüncənin formalaşmasındakı rolundan söz açılıb. “Qobustan”ın bu zəngin irsi yeni nəsillərə çatdırmaq təşəbbüsü yüksək qiymətləndirilib.

Jurnalın baş redaktoru, yazıçı-dramaturq Pərvin Nurəliyeva tədbir iştirakçılarına və müəlliflərə minnətdarlığını bildirib, gənc qələm sahiblərinin dəstəklənməsi istiqamətində həyata keçirilən “Söz müəlliflərdə” layihəsindən danışıb. Qeyd edib ki, layihə çərçivəsində mətbuatda ilk dəfə yazısı dərc olunan 100-dən artıq gənc müəllifə jurnalın səhifələrində yer verilib.

Tədbirdə iştirak edən gənc şair, yazıçı və dramaturqlar da yaradıcılıqlarına göstərilən dəstəyə görə jurnalın kollektivinə təşəkkür ediblər.

İki jurnal, bir mədəni yaddaş

“Molla Nəsrəddin” bir əsrdən artıqdır ki, milli düşüncəmizin, özünüdərkimizin və tənqidi təfəkkürümüzün mühüm ünvanlarından biri olaraq qalır. “Qobustan” isə fərqli sənət sahələrini və ədəbi nəsilləri öz səhifələrində görüşdürərək mədəni yaddaşımızın davamlılığına xidmət edir.

Bu iki nəşrin xüsusi buraxılışın səhifələrində görüşməsi sadəcə yubiley hadisəsi deyil, həm də ədəbi varisliyin, milli düşüncəyə sədaqətin və sözün zaman qarşısındakı dayanıqlığının ifadəsidir.

Mirzə Cəlilin 120 il əvvəl oxucusuna ünvanladığı söz bu gün “Qobustan”ın səhifələrindən yeni nəslə səslənir. Zaman dəyişsə də, düşündürən, oyadan və həqiqəti söyləyən sözün missiyası dəyişmir.

Məhəmməd,
Manera.az



Baxış sayı - 98 | Yüklənmə tarixi: 18.11.2026 13:00
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2026    »
 1
2345678
9101112131415
16171819202122
23242526272829
30