Əli Rüzgar

Və​

Bir gün solar çiçəklər,
Həsrətini iylərəm.
Sən məni yad bilərsən,
Mən səni yad eylərəm.

Səmadan sətirlərə

Uşaqsansa əzizim,​
Çıx gəl gedək gəzməyə.​
Yerə yağış atmağa,​
Göyə ulduz düzməyə.

Çiçəklərə qonarıq,​
Balaca bir quş olub.​
Dalğalara düşərik,​
Balıqlara qoşulub.

Sən aypara olarsan,​
Çevrilərəm mən günə.​
Paltarımız bulaşar,​
Göyqurşağı rənginə.

Uşaqsansa əzizim,​
Dur gəl gedək gəzməyə.​
Yerə yağış atmağa,​
Göyə ulduz düzməyə.

Sevirəm

Quşları sevirəm,
Balıqları da.
Uçmağı bacarmasam,
Üzməyi bilməsəm də.
Səssizliyi sevirəm​
elə uşaqları da.

Sığırçınım

Ey ömrümün tən yarısı,
Bu dağların çiçəyinə,
Çiçəklərin ləçəyinə,
Daha gəlmir bal arısı.

İtgin düşüb gecələrin,
Ən sevimli ulduzları,
Şirin-şəkər, şən qızları,
Uşaqları küçələrin.

Yoxluğunda çıxır canım.
Ovuclarım quş yuvası:
Yiyəsi yox boş yuvadı
Dön, əlləri sığırçınım.

MANERA.AZ