Noyabrın 3-də Azərbaycan Dövlət Akademik Opera və Balet Teatrının səhnəsində İspan milli rəqs teatrı “FlamencoLive” “Romeo və Cülyetta” şou-proqramı ilə çıxış edəcək.

Teatrdan Manera.az-a bildirilib ki, bu yeni versiyada Şekspirin məşhur əsəri ispan rəqs dili ilə təqdim olunur. “FlamencoLive” art proyektində beynəlxalq səviyyəli peşəkar aktyorlar canlı, orijinal, həqiqi ispan flamenkosu ilə tamaşaçıları riqqətə gətirəcək. Teatr bütün ömrünü “pour flamenco” – orijinal flamenkoya həsr edən ən yaxşı rəqqasları, gitaristləri, kantaorları (vokalist) və perkussionistləri öz heyətinə toplayıb. Kollektivin bütün iştirakçıları bir çox beynəlxalq konkursların laureatıdır.

Teatrın aparıcı rəqqası El Tebi bir çox ispan teatrlarında çıxış edib. Rəqs dili ilə sevgi hekayəsi, İspan flamenkosunun sehrli dünyası, əllərin sehrli hərəkəti, yelpiyin ehtiraslı çırpınması tamaşaçıları isti Əndəlüs sahillərinə aparacaq.

Qeyd edək ki, şou-proqram saat 19.00-da başlayacaq.