Azərbaycan Dövlət Akademik Milli Dram Teatrında Xalq Yazıçısı Elçinin eyniadlı əsəri əsasında hazırlanmış “Qatil” tamaşası nümayiş olunub.

Teatrın mətbuat xidmətindən MANERA.AZ-a bildirilib ki, tamaşanın quruluşçu rejissoru Əməkdar İncəsənət Xadimi Mehriban Ələkbərzadə, bəstəkarı Əməkdar İncəsənət Xadimi Aygün Səmədzadə, quruluşçu rəssamı Əməkdar Mədəniyyət İşçisi İlham Elxanoğludur.

Səhnə əsərində rolları Xalq Artisti Səidə Quliyeva, Əməkdar artistlər Münəvvər Əliyeva, Elxan Quliyev və aktyor Hikmət Rəhimov oynayıblar.

Mövzusu qadın sevgisi olan tamaşanın süjet xətti, uzun müddətdir müəllimə işləyən bir qadının faciəli həyatı üzərində qurulub.

Saxtakar, yalançı, fırıldaqçı oğlan başı ancaq şagirdlərinə qarışan, tənha, yaşı ötmüş, sevgi gözləyən müəllimin həyatına girir. O, yalanlarla saf qadının təmiz hisslərinin qatili olur. Müəllimin evini və ürəyini zəbt edən oğlan sonda onu qatil edir.

Sosial dəyişikliklər fonunda dərin mənəvi-psixoloji reallıqları əks etdirən səhnə əsəri tamaşaçılar tərəfindən maraqla qarşılanıb.