30.08.2024 |Manera.az| Bu il Avqustun 29-da Türkiyənin Marmaris şəhərində Azərbaycanın Türkiyədəki Səfirliyinin nəzdində fəaliyyət göstərən Azərbaycan Mədəniyyət Mərkəzinin təşəbbüsü ilə "Azərbaycan Mədəniyyət və İncəsənət Günü" tədbirləri start götürüb.

Manera.az xəbər verir ki, Tarixi bir turizm şəhəri olan Marmarisin antik amfiteatr səhnəsində açıq havada "Elvedasız Şarkılar" adlı möhtəşəm bir konsert proqramı təqdim olunub. Tədbirdə Marmaris sakinləri və şəhərə gələn turistlər böyük maraqla iştirak ediblər. Konsert proqramında Azərbaycanın mədəniyyəti, tarixi, incəsənəti və turizmi haqqında video materiallar nümayiş etdirilib.

Mərasimdə çıxış edən Marmaris valisi Nurullah Kaya və Azərbaycanın Türkiyədəki Səfirliyinin nəzdində fəaliyyət göstərən Azərbaycan Mədəniyyət Mərkəzinin rəhbəri Samir Abbasov bu cür tədbirlərin Azərbaycan musiqi sənəti ilə tanışlıq imkanı yaratdığını vurğulayıblar. Onlar çıxışlarında Azərbaycan-Türkiyə qardaşlığı, mədəni əlaqələrimiz, zəngin musiqi sənətimiz və "Azərbaycan Mədəniyyət və İncəsənət Günü" barədə geniş məlumat veriblər.

Konsert proqramı çərçivəsində məşhur müğənni Bora Gencerin rəhbərlik etdiyi "Elvedasız Şarkılar" adlı musiqi layihəsi təqdim olunub. İlk olaraq Türkiyənin tanınmış müğənniləri və Azərbaycan və Özbəkistanın xalq artisti Gülyanaq Məmmədova milli musiqimizi səsləndirib. Azərbaycan musiqisi çalınarkən, Azərbaycanın zəngin mədəniyyəti, tarixi və turizm gözəlliklərini əks etdirən video materiallar göstərilib.

Azərbaycanlı gənc müğənni Aynur İsgəndərlinin "Çırpınırdı Karadeniz" mahnısını ifa etməsi izləyicilər tərəfindən gurultulu alqışlarla qarşılanıb. Türk dünyası arasında həmrəyliyə, vətənə, Azərbaycan-Türkiyə qardaşlığına həsr olunan musiqilər böyük maraqla qarşılanıb.
Azərbaycan Mədəniyyət Mərkəzinin Azərbaycan Xalq Rəqsləri Ansamblı milli rəqslərimizi, o cümlədən "Azərbaycan süitası", “Cəngi” və digər rəqsləri təqdim edib.

Musiqi layihəsinin yaradıcısı müğənni Bora Gencerin ifasında musiqi performansı nümayiş etdirilib. Tədbirin qonağı kimi məşhur Türk müğənniləri Murat Kekilli, Fatih Erkoç, Yeşim Salkım, Nükhet Duru, Ozan Orhon və digər sənətçilər dəvət edilib və onlar gözəl musiqi nömrələri təqdim ediblər.
Qeyd edək ki, "Azərbaycan Mədəniyyət və İncəsənət Günü" tədbirləri avqustun 31-də Antalyada davam etdiriləcək. Bu çərçivədə Antalyada Nazim Hikmət Konqres Mərkəzində "Azərbaycan Gözəl Sənətləri" adlı sərgi açılacaq.





Бесплатные шаблоны для 10.5Forex Портал для чайников