Bakı Şəhər Mədəniyyət Baş İdarəsinə tabeli Aşıq Rza Qobustanlı adına Qobustan Mədəniyyət Evinin təşkilatçılığı ilə Azərbaycan Yazıçılar Birliyinin Poeziya bölməsinin rəhbəri, Ə.Kərim adına Sumqayıt Poeziya Evinin direktoru, tanınmış şair-tərcüməçi İbrahim İlyaslı ilə görüş keçirilib.

MANERA.AZ xəbər verir ki, tədbiri Mədəniyyət Evinin nəzdində fəaliyyət göstərən bədii qiraət dərnəyinin rəhbəri Daşqın Sabiroğlu açaraq İbrahim İlyaslının yaradıcılığından ətraflı bəhs edib.

Daha sonra söz Qaradağ rayonundan Milli Məclisə üzv seçilmiş Aydın Hüseynova verilib. İbrahim İlyaslının poeziyasından və tərcüməçilik fəaliyyətindən söz açan millət vəkili onu çağdaş ədəbiyyatımızın tanınmış nümayəndəsi olaraq dəyərləndirib, şairi 60 illik yubileyi münasibəti ilə təbrik edib.

Tədbirdə qonaq qismində iştirak edən şairlər Ehtiram İlham, Hikmət Fərzəli, Novruz Qələndərli, Qalib Nuri Arif, Qorxmaz Kadusi, müəllimlərdən Aynur Cavid və Lalə İsmayılova İbrahim İlyaslının yaradıcılığı haqqında fikirlərini oxucularla bölüşüblər.

Daha sonra bədii qiraət dərnəyinin üzvləri olan məktəblilər şairin şeirlərini ifa edib, bir-birindən maraqlı kompozisiyalarla çıxış ediblər.

İbrahim İlyaslının şeirlərini saz havaları üstə oxuyan Aşıq Elməddin Məmmədlinin ifası isə tədbirə xüsusi rəng qatıb.

Tədbir iştirakcıları şairə suallar ünvanlayıblar.

Oxucuların suallarını səmimiyyətlə cavablandıran şair tədbirin təşkilatçılarına və iştirakçılarına diqqət və sayqı üçün dərin təşəkkürünü bildirib, yeni şeirlərindən nümunələr oxuyub.

Sonda çıxış edən Mədəniyyət evinin direktoru Əli Quliyev qonaqlara və tədbirə gələn hər kəsə təşəkkürünü bildirib.

Fotolar Şakir Rəhmanındır.










Бесплатные шаблоны для 10.5Forex Портал для чайников