MANERA.AZ tanınmış şair Qulu Ağsəsin yeni şeirlərini təqdim edir:

Tabutdan başqa heç yerdə ayaqlarını oxxaynan uzatmayıb

Atam
bu dünyada
o dünyanın
cəhənnəm əzabını çəkib,
Qırx bir – qırx beşdə
faşistlərlə döyüşüb Kerçdə –
atəş kəsiləndə,
ya da siqaret fasiləsində
Gülablıda odun doğrayıb,
axura ot töküb…
Üzünü xatırlamıram deyə,
hərdən elə bilirəm,
məni öləndən sonra əkib…
Bir tikə çörəyin dərdindən
gecə yatmayıb,
gündüz yatmayıb,
tabutdan başqa heç yerdə
ayaqlarını oxxaynan uzatmayıb…
Şəkli də qalmayıb
darıxanda köksümə sıxım,
bütün ömrü dincəlsəm də doymuram –
atamın yorğunluğu
mənim canımdan çıxır…

Yaxşı pəhrizi var iztirabların

Bəzi şeirlərin hekayəsi var,
Bəzi xoşbəxtliyin qafiyəsi var.
Buludlar yağış yox, toz ələyirlər
Ulduzlar yanmır ha…
his eləyirlər.
Beş-üç arzu etməz ömrün qalığı
Didir başımızı kəpək balığı.
Daş-daş oynanılan bir aynabəddi,
Aman umduqları amana bənddi.
Nə talant?
nə vergi?
nə sehr? –
Adam
Günü axşam edir bikarçılıqdan.
Yaxşı pəhrizi var iztirabların
Nə özüm kökəldim,
nə kitablarım…


***
Hara baxıram, şairlər:
bu çığıran şairlər,
bu bağıran şairlər,
bayatı, ağı deyən,
ağıstan şairlər,
qayanı, dağı döyən
dağıstan şairlər...
Təşbehi bəndin içinə
iki əllə atanlar,
mikrofon önündə
kəllə atanlar
(qeybət daşıyır taksi qulaqları,
asmaq da olmur bu ipiqırıqları)...
Razıyam:
yuxarıda,
aşağıda
yerinizi bərkidin,
bircə yaxadan tutub
danışmağı tərgidin,
bircə misranın qulağın
burub qışqırtmayın,
bircə şeiri oxucu
üstünə qısqırtmayın!..