Şair Mahir Mehdinin yeni şeirlər kitabı çapdan çıxıb.

Manera.az xəbər verir ki, "Bir eşq redaktəsi" adlanan kitab "Mücrü" nəşriyyatında nəşr olunub.

Kitabdan müəllifin bir şeirini təqdim edirik:

Bir eşq redaktəsi

Ayılarsan olanından,
qüvvədən düşər dünənin.
sözləşər,
şəklin dəyişib,
dörd hərfə sığar bədənin.

Əvvəl açaram daraqla
bitişmiş
varaqlarını.
Oxuyaram not yazılmış
varağın qıraqlarını.

Əvvəl düzərəm sıraya,
yoxlayaram
dönə- dönə.
Sonra artıq kəlmələri
arıtlaram dənə-dənə.

Sonra öpərəm adını,
sözlərini dişləyərəm.
Sonra yıxıb bir varağa
səni söz-söz
işləyərəm...

Ən ağır bir ritmə salıb,
rəngləyərəm cümlə-cümlə.
Səni yeni
redaktədə
çevirərəm bizim dilə...