Manera.az Qəşəm Nəcəfzadənin yeni şeirini təqdim edir:


Qəşəm Nəcəfzadə öldü....

Atamın qəbrinin yanında gül var,
Sazımda, sözümdə bir qırıq tel var,
Qapımda gülüng var, bir təzə bel var,
Qəşəm Nəcəfzadə öldü.

Sevgilim şəkilimi töküb ağlayır,
Şəkillər boynumu büküb ağlayır,
Internetdə şəklim sinə dağlayır,
Qəşəm Nəcəfzadə öldü.

Sizlərə bir salam verəydim dedi,
Dostlardan bir sevinc dərəydim dedi,
Kaş birdə günəşi görəydim dedi,
Qəşəm Nəcəfzadə öldü.

Məni öldürdülər, siz dinmədiniz,
Gözüm sizi gəzdi, görünmədiniz,
Bir dəfə şeirimi bəyənmədiniz,
Qəşəm Nəcəfzadə öldü.

Əlləri buz kimi, üzü qarıydı,
Qəbri indi geniş, dünya darıydı,
Oxuyub deyərlər nəyi varıydı,
Qəşəm Nəcəfzadə öldü...

Manera.az