Mədəniyyət naziri Anar Kərimovun müvafiq əmri ilə istedadlı gənc rəssam Vüsal Rəhim Azərbaycan Dövlət Akademik Musiqili Teatrının baş rəssamı təyin olunub.

Bu barədə Manera.az-a Teatrdan məlumat verilib.

Qeyd edək ki, Vüsal Xəlil oğlu Rəhimov 20 dekabr 1987-ci ildə Gəncədə anadan olub. 1994-2005-ci illərdə Gəncə şəhəri 20 saylı orta ümumtəhsil məktəbində oxuyub. 2007-2011-ci illərdə Azərbaycan Dövlət Rəssamlıq Akademiyasında "Teatr-dekor sənəti" ixtisası üzrə bakalavr təhsili alıb. 2011-ci ildən müstəqil yaradıcılıq fəaliyyətinə başlayan V.Rəhim elə həmin ildən həm də quruluşçu rəssam kimi ölkənin ayrı-ayrı teatrlarında onlarla tamaşanın quruluşçu rəssamı olub.

2014-ci ildən Azərbaycan Dövlət Akademik Musiqili Teatrında bədii tərtibat işlərinin icraçı rəssamı, 2019-cu ildən bu ilin noyabr ayınadək isə quruluşcu rəssam kimi fəaliyyət göstərib.

"Skapenin kələkləri" (J.B.Molyer), "Yatmış gözəl va cırtdanlar" (Ş.Pero), "Qızıl toy" (O.Kazımi, R.Heydər), "Cırtdanın Yeni il sərgüzəşləri" (Azərbaycan xalq nağılı "Cırtdan"ın motivləri əsasında), "Nuri-didə Ceyhun" (Ə.Əmirli), "Qızıl açar” və yaxud “Buratinonun macəraları" (A.Tolstoy), "Paris Notr-Dama ithaf" (V.Hüqo səhnələşdirmənin müəllifi: S.Qulamov) kimi tamaşalara bədii tərtibat verib.

Ümumilikdə 4 fərdi sərginin müəllifi olan gənc rəssam 100-ə yaxın yerli və beynəlxalq sərgidə iştirak edib, 40-a yaxın sosial-mədəni layihənin meneceri, həmçinin 3 çoxserialı bədii filmin quruluşcu rəssamı, çox sayda tamaşa və konsertlərin səhnə və geyim tərtibatçısı olub.