Fevralın 2-də Beynəlxalq Mətbuat Mərkəzində Qafqaz Media İctimai Birliyinin təşkilatçılığı ilə 2 fevral -Gənclər gününə həsr edilmiş tədbir keçirilib.

İctimai Birliyin sədri Azadə Hüseynova 1997-ci ildə ümummilli lider Heydər Əliyevin imzaladığı “2 fevral - Azərbaycan Gəncləri gününün elan edilməsi haqqında” Sərəncamı, Ulu Öndərin Azərbaycan gəncliyinə göstərdiyi diqqət və qayğının bariz nümunəsi kimi dəyərləndirib. Həmin vaxtdan etibarən hər il 2 fevral günü Azərbaycan gənclərinin bayramı kimi təntənəli şəkildə qeyd olunur.



Azərbaycanda dövlət gənclər siyasətinin təşəkkül və inkişafının ümummilli lider Heydər Əliyevin adı ilə bağlı olduğunu vurğulayan A.Hüseynova xatırladıb ki, Ulu Öndər Azərbaycana rəhbərliyinin bütün dövrlərində gənclərə həmişə böyük qayğı göstərib, onların hərtərəfli inkişafına xüsusi diqqət yetirib. Bunun sayəsində hazırda gənclər dövlət orqanlarında, parlamentdə, iri biznes və maliyyə qurumlarında, bələdiyyələrdə geniş təmsil olunur, ölkəmiz üçün taleyüklü məsələlərin həllində fəal rol oynayır, təhsil, mədəniyyət, idman və digər sahələrdə parlaq nailiyyətləri ilə Azərbaycanı dünyada uğurla təbliğ edirlər.

Tədbirdə “Borçalı” cəmiyyətinin sədri Şərif Kərimli, “Xocalı Soyqırımını Tanıtma” İctimai Birliyinin sədri Şamil Sabiroğlu, şair Zərəngiz Dəmirçi Qayalı və başqaları Azərbaycanda həyata keçirilən gənclər siyasətinin bir çox ölkələr üçün nümunə olduğunu söyləyiblər. Ümummilli lider Heydər Əliyevin əsasını qoyduğu dövlət gənclər siyasətinin hazırda Prezident İlham Əliyevin rəhbərliyi ilə uğurla inkişaf etdirildiyini, bu istiqamətdə ardıcıl tədbirlər görüldüyünü, əhəmiyyətli nəticələr əldə olunduğunu diqqətə çatdırıblar.

Sonda elm, təhsil, mədəniyyət, incəsənət, ədəbiyyat sahəsində, ictimai fəaliyyətində fərqlənən gəclərə İctimai Birliyin fəxri fərmanları təqdim olunub.



Təltif olunanlar arasında Manera.az saytının baş redaktoru Şəhla Aslan da olub. O aktiv və obyektiv fəaliyyətininə görə İB-in Fəxri Fərmanına layiq görülüb./Azərtac