Əlişir Nəvai adına Özbək Dili və Ədəbiyyatı Universitetində İsveçdə yaşayan soydaşımız, yazıçı Eluca Atalının Daşkənddəki “Turon zamin ziyo” nəşriyyatında özbək dilində çap olunan “Özünü gətir” adlı kitabının təqdimatı keçirilib.

Tədbirdə mədəniyyət və incəsənət xadimləri, şair və yazıçılar, universitetin tələbə və müəllimləri iştirak ediblər.

Təqdimat mərasimini yazıçı Uluqbek Xamdam açaraq Eluca Atalının yaradıcılığı və yeni kitab haqqında məlumat verib. Deyilib ki, indiyədək Azərbaycan, Türkiyə, İsveç, Özbəkistan və digər ölkələrdə yazıçının hekayə, roman, esse, şeir və dram əsərləri və digər janrlarda 18 kitabı çap olunub.

Kitabın tərcüməçisi Şermurad Subxon Eluca Atalı ilə yaradıcılıq əlaqələri və kitab üzərindəki işindən danışıb, əməkdaşlığın bundan sonra da davam edəcəyini bildirib.

Eluca Atalı kitabın çapı və təqdimat mərasiminin keçirilməsi üçün təşkilatçılara təşəkkürünü bildirib, İsveçdəki fəaliyyəti haqqında məlumat verib. O deyib ki, Stokholmda Azərbaycan ədəbiyyatı, mədəniyyəti, incəsənəti ilə bağlı müxtəlif yığıncaqlar keçirilir və bu tədbirlərə Azərbaycandan da qonaqlar dəvət olunur.

O, gələcək planlarından da danışıb, tələbələrin müxtəlif suallarını cavablandırıb.