“Türkologiya” seminar keçirəcək

05 oktyabr 2017-ci ildə Azərbaycan Milli Elmlər Akademiyası (AMEA) Mərkəzi Elmi Kitabxanasında “Türkologiya” jurnalının növbəti seminarı keçiriləcəkdir.
AMEA-nın Rəyasət Heyətinin qərarı ilə daha geniş istiqamətləri ehtiva edən beynəlxalq elmi jurnalın məqsədi “Sovetskaya Türkologiya” jurnalının ənənələrini davam etdirmək, türkoloji tədqiqat və mövzulara türkoloqlarla yanaşı, digər elm adamlarının marağını da cəlb etməkdir.
Məhz bu baxımdan jurnal hər ay türkologiya elminin qarşısında duran müxtəlif problemlərin araşdırılması mövzusunda seminarlar keçirir.
“Türkologiya” beynəlxalq jurnalının budəfəki seminarı “Müasir türkologiyanın aktual və mübahisəli problemləri” mövzusuna həsr olunmuşdur. Seminar Azərbaycanın əməkdar elm xadimi, fəlsəfə elmləri doktoru, filosof, tədqiqatçı alim Zümrüd Quluzadənin moderatorluğu ilə 05 oktyabr 2017-ci il tarixində (saat 11:00) AMEA-nın Mərkəzi Elmi Kitabxanasında (301-ci otaq) keçiriləcəkdir.