“Bir daşla doqquz quş” layihəsində bu dəfə suallara yazıçı-tərcüməçi Nəriman Əbdülrəhmanlı cavab verir.

-Niyə varsan?

-Yəqin ki, İlahi kiçicik bir missiya tapşırdığına görə.

-Niyə yox olacaqsan?

-Bu dünyada missiyamı başa vurduğuma görə.

-Niyə yazırsan?

-Yazmaya bilmədiyimə görə.

-Yaşamaq nədir?

-Ömür möhlətini xərcləyə-xərcləyə əlçatmaza can atmaq.

-Ölüm nədir?

-Həyatın tam dərki.

-Ədalət nədir?

-İmkandan asılı olan məfhum.

-Azadlıq nədir?

-Özündə nələrdənsə imtina eləməyə qüvvə tapmaq.

-Yaradıcılıq nədir?

-Ömür sıxıntısından can qurtarmaq cəhdi.

-İnsan kimdir?

-İki aləmi özündə sığışdırmağa can atan, amma daim uğursuzluğa düçar olan məxluq.

Tural İsmyılov,
MANERA.AZ