manera.az
manera.az

Gəzməyə yurdum var - Yeni şeirlər

Gəzməyə yurdum var - Yeni şeirlər
MANERA.AZ Cavad Zeynalın yeni şeirlərini təqdim edir:

Gəzməyə yurdum var

Gəzməyə yurdum var, ölməyə yerim.
Narahat olmağa bir əsasım yox.
Tarixi zəfərlə keçir günlərim,
Daha qiyamətə bir qisasım yox.

Diz çökdü qarşımda qarı düşmənim,
Diz çökdü, çıxartdı gürzə dilini.
Qərq oldu, məhv oldu zərbimdən mənim,
Kəsdi birdəfəlik hərzə dilini.

Mənə əl eyləyir zümrüd meşələr,
Dağılan məzarlar ocaqlaşırlar.
Ulduzlar az qalır yerə düşələr,
Həkəri, Bərgüşad qucaqlaşırlar.

Açıldı, töküldü nələr, niyələr,
Açımlar, tökümlər nə qoxuyurdu?
Düşünsün bir az da bələdiyələr,
Soyuq məzara da pul oxuyurdu.

Elə sağalmışam, ağrım-acım yox,
Qəlbimdə yox daha qüssə-kədərim.
Daha ilahidən umacağım yox,
Gəzməyə yurdum var, ölməyə yerim.
19.11.2020

Baş daşı

Anama baş daşı olmuşam, Allah,
Ayağım torpağa yapışıb qalıb.
Körpə uşaq kimi dolmuşam, Allah,
Həsrətim vüsalla çarpışıb qalıb.

Bir canlı heykələ dönüb qalmışam,
Anamdan min dəfə üzr istəyirəm.
Gözündə çıraqdım, sönüb qalmışam,
Özümə min dəfə hüzr istəyirəm.

Çağrışı səssizdi, gəlmişəm heyə,
Anamdan neçə yaş qoca olmuşam.
Ahları torpaqda qalmasın deyə,
Anamın ahına baca olmuşam.

Danışan qəlbimə kim qulaq asır,
Yerimdə qalmışam, tərpənməyirəm.
Gecələr adamı burda xof basır,
Bəs niyə, bəs niyə ürpənməyirəm?

Ümiddən qəlbimə sular içirtdim,
Köksümdə sızıltım zil oldu getdi.
Ömrümdən həsrətli illər keçirtdim,
Hər ilim gözümə mil oldu getdi.

Mən ürək vermirəm söz gizlətməyə,
Körpə uşaq kimi elə dolmuşam.
Gərək də bilmirəm daş düzəltməyə,
Anamın baş daşı özüm olmuşam.
23.11.2020

Hər qarışda izim var

Pəncəm üstə gəzirəm -
Oyanar uşaqlığım.
Qaçıb yenə uzaqda
Dayanar uşaqlığım.

Hər qarışda min izim,
Hər qarışda xatirəm.
Qayıtmışam ilkimə -
Dağda-daşda xatirəm.

Qarğı atım qaralıb,
Çox sürmüşəm, deyəsən.
Sığmamışam özümə,
Lap kürmüşəm, deyəsən.

Qara quzey, yal beli -
Gülü həsrət qoxuyan.
O gördüyün mənəm, mən,
Yaqub üstə oxuyan.

Üzüm dönüb buluda,
Gözlərimdən çəkir nəm.
Danışan da, dinən də,
Dinləyən də özüməm.
13.11.2020

Doymuram

Qoyun yavanlıq kimi,
Süfrəmə torpaq qoyun.
Pak yaranıb əzəldən,
Eləcə də pak qoyun.

Çörəyimə səpim mən
Naxçıvan duzu kimi.
Batırım hər loxmamı,
Yalayım quzu kimi.

Saralıbdı çölləri,
Otu yaman solubdu.
Şirinliyi özündən,
Lap yeməli olubdu.

Hər zərrəsi müqəddəs -
Əlimdən heç qoymuram.
Təbərrikdi, tutyadı,
Yeyirəm də, doymuram.
09.11.2020Бесплатные шаблоны для 10.5Forex Портал для чайников






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2022    »
 12
3456789
10111213141516
17181920212223
24252627282930
31