manera.az
manera.az

Bircə məhəbbətə qalıb inamım – Ağalar Mirzənin şeirləri

Bircə məhəbbətə qalıb inamım – Ağalar Mirzənin şeirləri
MANERA.az «Unudulmazlar» rubrikasında mərhum şair, alim Ağalar Mirzənin şeirlərini təqdim edir:

***
Durnalar uçub gedir,
Dalısınca səsləri.
Dalısınca gözlərim,
Yox olunca gözləyir.

Durna köçür-payızdı,
Durna gəlir-bahardı.
Həsrətin, məhəbbətin,
Durna oxşarı vardır.

Yağdı bahar ömrümə,
Yağdı həsrətin qarı.
İndi uçur ömrümün,
Vəfasız durnaları.


***
Yarpaqlar atılır budaqdan,
Düşür budaqların dişi.
Hərdən sarı yarpağa da,
Düşür adamın işi.

Atılır budaqdan, yıxılır,
Payız qaldırır, öpür.
Düşən yarpağın axırı,
Alışan kibrit çöpü.

O düşür çiynimə, neyləyim,
Çiynimdə bir körpə əli.
Beləcə, gəlirəm evimə,
Əliboş, çiyni körpəli.


***
Yağışlar da yağır
Yarpaqlar da...
Yağır göz yaşları
Yarpaqlar yağanda.

Bəlalı sevgilərə
Yağır payız yağışı
Yağır kirayənişin
Qalanların evinə..
Bəxti gur adamların
Nə vecinə yaz, payız?
Güclə gözləri gülən
Mən yazığın gözünə
Yağır payız amansız.

Dünən səni yuxuda
Görmüşəm..
Bəxtimə bax,
Onda da aramıza
Qondu bir sarı yarpaq.

Dünyada adamlar var

Dünyada adamlar var
Baxırsan hamısının
Başı, ayağı.
Amma birinin başı var,
O birinin baş aparmağı.

Birinin sözü bütövdü,
Çörəyi para.
Üzü ağdı, günü qara.
O birinin üzü qaradı,
Günü ağ.
Əməli xəstədi, canı sağ.

Dünyada başlar var
Quruca əlini dolandıra bilmir
Əllər var baş dolandırır,
Dünyada baş var –
Bir eli qoruyur, girləyir.
Dünyada adamlar var -
Baş girləyir.
Nəsə, dünyadan
Adam, badam iysi gəlir.


***
Mənim bir ümidim bu sevgiyədi,
Olmayan olacaq dinib “ol” desə.
Necə ki, insanı Məcnun elədi,
Necə ki, bülbülü saldı qəfəsə.

Bu dünya bir papaq-başıma dardı,
Qəlibi qarsıyır ayaqlarımı.
İnamsız dünyası olan yarımır,
İnamım var idi dostlar apardı,
Götürüb apardı dayaqlarımı.

Bircə məhəbbətə qalıb inamım,
Nə vaxtsa o məni adam eyləyib.
Çəkib süfrəsinə dadlı dünyanı,
Ala gözlərimi badam eyləyib.

Mən onda tanıdım çürüyü-safı,
O vaxtdan pas atır qəzəbim “qında”.
Mənimçün mələklər seçib insafı,
Alnıma məhəbbət yazılıb onda.

Bu günün eşqinə açılır sabah,
Sevgi qul önünə çəkir şahı da.
Deyirsən hər şeyi yaradan-allah!
Məhəbbət yaradır bir allahı da.


***
Ayrılıq azalır görüşəndə biz,
Bağlı qapı açan bir günahımsan.
Ayrı yaşayırıq bir ürəklə biz,
Köksümün altında uzaqlığımsan.

Gedirsən..təkliyə düşüb batıram,
Bilirəm ürəyin qaldı sənin də.
Mən indi vağzala gələn qataram,
Düşürsən ömrümün pilləkənindən.

Gəlirəm görüşə, gedirəm işə,
İnam bir şeyədi, güman min yerə.
Mən sənə o qədər isinişmişəm,
Bir də bu dünyaya öyrəşəmmərəm.

Paxıl qara yaxır paxıllığından,
Sevə bilməyənlər yazıqlaşırlar.
Bəlkə, sənə sonsuz yaxınlığımdan,
Dostlarım bir ucdan uzaqlaşırlar.

Getdin

Getdin,​ sən​ də​ getdin, bahar​ da​ belə,
Məni​ tənha​ qoyub​ yağışla-qarla.
Gedən​ qışla​ gedir,​ yağışla​ gedir,
Durna​ qatarında​ gəlir​ baharla.

Mənim​ ünvanımda​ bir​ yazın​ adı,​
Taleyim​ sevginin​ suçəkənidi.
Bu​ yazın​ sevinci​ səninlə​ olsun,
Mənə​ o​ payızın​ dərdini​ gətir.

Mənim​ o​ illərdə​ məzarımı​ qaz,
Gəzirəm,​ gülürəm,​ demə​ ki,​ sağam.
Məni​ bu​ sevgisiz​ yazda​ dəfn​ elə,
Sevgili​ payızda​ qayıdacağam.

Dəyərsən mənim xətrimə​

Dəyərsən​ mənim​ xətrimə,
Xatirəmi​ də​ daşlarsan.
Bir​ gün​ düşüb​ qəfil​ ölsəm,
Yəqin​ məni​ bağışlarsan.

Ölüb​ getdim,​ unutmadın,
Yoluma​ işıq​ tutmadın,
A​ gözləri​ bulud​ qadın,
Xatirəmi​ yağışlarsan.

Yazıb​ Bisituna​ adın,​
Öldü​ bu​ eşqin​ Fərhadı.
Sən​ də​ öz​ başını​ qatıb
Təzə​ sevdalar​ başlarsan.

Sevdalar​ dərin​ olmasa.​
Ölsəm,​ xəbərin​ olmasa,
Qalmağa​ yerin​ olmasa,
Gəlib​ gözümdə​ qışlarsan.

Unutma

Mən gedirəm uzağa,
İzim, məni unutma.
Bezdim özümdən daha,
Dözüm, məni unutma.

Ölüb gül kimi bitsən,
Gələn yaza ümidsən...
İşdi, oğlum unutsa,
Qızım, məni unutma.

Baxmağa göz vermisən,
Əcəli tez vermisən...
Sən mənə söz vermisən,
Sözüm, məni unutma.

Bu sevda bir solan güldü

Mən​ gedirəm,​ sən​ qalırsan,
Sənə​ məndən​ zülüm​ olar.
Başın​ qoyub​ baş​ daşıma
Kim​ ağlasa,​ gülüm​ olar.

Daha​ öldüm,​ barışarsan,
Dost-tanışa​ qarışarsan.
Məndən​ deyib​ danışarsan,
Dinən​ dilin​ dilim​ olar.

Bu​ sevda​ bir​ solan​ güldü,
Çiçəklər​ gözünü​ sildi.
Mən​ bir​ yol​ ağrıyıb​ öldüm,
Sənə​ hər​ gün​ ölüm​ olar.

Tural Adışirinin təqdimatındaБесплатные шаблоны для 10.5Forex Портал для чайников






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2021    »
 123456
78910111213
14151617181920
21222324252627
282930