manera.az
manera.az

Bizə mirasdır torpaq - Gənc şairdən uşaq şeirləri

Bizə mirasdır torpaq - Gənc şairdən uşaq şeirləri
MANERA.AZ Əyyub Türkayın uşaq şeirlərini təqdim edir:

Xarıbülbül

Niyə çoxdur dəyəri,
Bildim xarıbülbülün.
Adını Şuşamızla
Bir çəkirlər bu gülün.

Artıq bu gül çevrilib
Bir zəfərin rəmzinə.
Sevilərək döşənib
Qarabağın düzünə.

Bir zaman düşmənlərə
Əsir düşmüşdü gülüm.
İndi azadlıqdadır
Mənim xarıbülbülüm.

Ana vətən

Bir sual var ki, tez-tez
Düşündürürdü məni.
Anaya bənzədirlər
Axı niyə Vətəni?

Bu sualın ən gözəl
Cavabın anam verdi.
Dedi: - Vətən bizlərə
Candan əziz bir yerdi.

Bu eldə, bu obada
Yaşamışıq əzəldən.
Bizə mirasdır torpaq,
Verə bilmərik əldən.

Sevməlisən yurdunu,
Doğmaca anan qədər.
"Ana", "Vətən" sözünü
Tutmalısan bərabər.

Vətən torpağı

Atalardan, babalardan,
Bizə miras qalan torpaq.
Uğrunda öz canın verən,
Ər-igidi olan torpaq.

Baxmayın ki, mən uşağam,
Savaş nədir, bilirəm mən.
Mənim atam cəbhələrdə
Məhv eləyib çoxlu düşmən.

Bu torpağı çox sevməyi
Öyrədibdir atam mənə.
Hər qarışın qorumağa
Mən borcluyam bu Vətənə.

Ütü

Nazlı ütüdən
Çəkinir yaman.
Onu görəndə
Baxır uzaqdan.

Çünki əlini
Yandırıb ütü.
Qorxudan yaxın
Gəlməyir qəti.

Uşaq oyunları

Gəlin gedək oynayaq,
Tez qarışıb qaynayaq.
Düzülüşək baş-başa,
Dövrə vuraq biz qoşa.

Çoxlu oyunlar ilə
Könüllər gəlsin dilə.
Kim hoppanar kəndirə,
Kim tullanar hündürə?

Hərəsi bir xal alsın,
Yerdə qalan əl çalsın.
Həm əylənək, həm gülək,
Qalib kimlərdir, bilək.

Sərhədçidir mənim atam

Gecə-gündüz qoruyur
Sərhədi mənim atam.
Keşiyində dayanır
Mən evdə rahat yatam.

O, zabitdir postlarda,
Bu peşəylə ucalır.
Uğurlu xidmətiylə
Layiqli qiymət alır.

Çiyinlərində vardır
Ay-ulduzlu poqonlar.
Rəşadətli hərbçinin
Yaraşığıdır onlar.

Bu peşədə görürəm
Gələcəyimi mən də.
Arzum budur ki, hərbçi
Olaram böyüyəndə.

Təmsillər

Xəstə tülkü

Bərk xəstələndi Tülkü,
Ölümlə pəncələşdi.
Pələng ilə Şir ona
Kömək üçün əlləşdi.
Tülkü dedi: - a dostlar,
Yaman xarabdır halım.
Mənə kömək olmasa,
Çətin həyatda qalım.
Pələng və Şir topladı
Meşədəki dostları.
Dəstək olsun Tülküyə,
Qoy çəkməsin qubarı.
Bir aydan artıq yatdı
Xəstə Tülkü yataqda.
Tanrı onu qoymadı
Ağır, çətin sınaqda.
Sağalıb xəstəlikdən,
Tülkü ayağa durdu.
Çox keçmədi dostlara
Pislik etdi - qudurdu.
Yenə hiyləgərliklə
Dedi yalan-böhtanı.
Ona əl tutanlarla
Pozdu əhdi-peymanı.
Xisləti pis olanlar
Çətin düz yola gələ.
İtirilmiş vicdanı
Tapan olmayıb hələ.

Quzğunun tövbəsi

Bir gün Quzğun and içdi
Uzunboğaz Leyləyə.
Dedi: - leş yemərəm mən,
Daha gəldim tövbəyə.
Qoy mənim də hörmətim
Bundan sonra çox olsun.
Keçmişdə etdiklərim
Unudulub yox olsun.
Artıq mən utanıram
İylənmiş ət yeməkdən.
Etiraf eləyirəm,
Çəkinmirəm deməkdən.
Leylək dedi: - mən kimi
Ye qurd, balıq, qurbağa.
Bəlkə, quşlar içində
Ola bilərsən ağa.
Quzğun bir həftəyədək
Başın qatdı beləcə.
Qarşısına leş çıxdı,
Xəlvəti, sakit gecə.
Acgözlüklə başladı
Ölmüş heyvan yeməyə.
Bunu görüncə Leylək,
Söz tapmadı deməyə.
Bilin ki, xasiyyəti
Çox çətindir dəyişmək.
Mayası pis olana
Sərf eləməyin əmək.

Özündən razı çaqqal

Çaqqalın mənəmliyi
Lap son həddə çatmışdı.
Bu minvalla aləmi
Bir-birinə qatmışdı.
İnadkar, cılız Çaqqal
Bilmirdi böyük-kiçik.
Onun peşəsi idi
Hamı ilə qərəzlik.
Bir neçə xəbərdarlıq
Edilmişdi Çaqqala.
İkiüzlü, bu xəbis
Çəkilmirdi heç dala.
Axır bir gün Canavar
Onu kənara çəkdi.
Ləyaqətsiz canlının
Təpəsində turp əkdi.

Sədaqətsiz meymun

Əlaqəsin kəsmişdi
Meymun dostları ilə.
Hörmətsizlik edirdi
Hamıya bilə-bilə.
Silmişdi yaxınların,
Günlərdir aramırdı.
Dürüst olmadığının
Heç fərqinə varmırdı.
Bu səbəbdən dostları
Ondan üz döndərdilər.
Meymuna məktub yazıb
Evinə göndərdilər.
Dedilər, "sədaqətsiz
Dostumuza ar olsun!
Yaxşı dostlar yaşasın,
Fitnəkarlar xar olsun!"
Qəlbini kin tutanın
İçi fəsadla dolar.
Yaxşıların yanında
Gözü kölgəli olar.

Günəş və yağış

Günəşlə Yağış
Mərcləşdi bir gün.
Öz güclərini
Göstərmək üçün.
Yağış elədi
Yekəxanalıq.
Dedi, mən yağsam,
Gərəkdir qayıq.
Düzü, aləmi
Mən su edərəm.
Həyət-bacaya
Sellə gedərəm.
Günəş dilləndi,
Bu ki güc deyil.
Əməlli-başlı
Bu pislikdir, bil.
Gücünü göstər
Sən yaxşılıqla.
Özünü öymə
Hey paxıllıqla.
Yaxşı əməlin
Məgər ki, yoxdur?
İçində pislik
Bu qədər çoxdur?
Məsləhətim var,
Sən yağ çöllərə.
Qoy bolluq gəlsin
Bizim ellərə.
Bağlar göyərsin,
Yamyaşıl olsun.
Bol məhsul ilə
Çuvallar dolsun.
Yaxşını qoyub
Pisliyə qaçma.
Şər işlər görüb
Oyunlar açma.
Yağış utanıb
Yaman pərt oldu.
Həyat dərsini
Günəşdən aldı.

Körpü və çay

Körpü Çaya söylənib,
Elədi giley-güzar.
Dedi: -görürəm mənə,
Heç olmursan havadar.
Sənə əziyyət deyil,
Sakit-sakit axırsan.
Mən çəkirəm əzabı,
Sən kənardan baxırsan.
Mənim üstümdən keçir
Maşınlar, həm insanlar.
Axı mənim dərdimi
Heç bilmirəm kim anlar.
Bəlkə, sel yaradasan,
Bir daşqın eləyəsən.
Suya qərq edib məni,
Yuyub aparasan sən.
Çay dedi: -yadımdadır
Sənin qurulduğun gün.
İnsanlar sevincindən
Eləyirdi toy-düyün.
Sən həyatda hər kəsin
Ümid, güman yerisən.
Var olmana söyləyir
Hamı ürəkdən “əhsən”.
Çayın nəsihətləri
Körpüyə çox xoş gəldi.
Özünün dəyərini
İndi yaxşıca bildi.

Dağ və təpə

Bir gün Dağ qürrələnib,
Baxdı kiçik Təpəyə.
Dedi: -mənim yanımda,
Oxşayırsan körpəyə.
Mənim başım ucadır,
Buludlardan nəm alır.
Sənə isə həyatda,
Balaca olmaq qalır.
Təpə bir söz demirdi,
Sakit qalıb baxırdı.
Dağın kəskin sözündən,
Yamanca darıxırdı.
Elə bu an səs gəldi,
Silkələndi obalar.
Dağı tez partlatdılar,
Dinamitli bombalar.
Dağ oldu bir düzənlik,
Yerində yol saldılar.
Uca dağın vüqarın,
Belə əldən aldılar.
Bütün bu olanlara
Təpə heyrətlə baxdı.
Lovğalığın axırı,
Dağı yandırıb yaxdı.

Bizə mirasdır torpaq - Gənc şairdən uşaq şeirləriБесплатные шаблоны для 10.5Forex Портал для чайников






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2022    »
 1234
567891011
12131415161718
19202122232425
262728293031