Hörmətli Məhyəddin Məhərrəmoğlu! Sizi-ömrünün müdrik çağlarını yaşayan tanınmış şair dostuuzu 80 illik yubileyiniz münasibəti ilə təbrik edir, sizə möhkəm cansağlığı, könül xoşluğu, yeni-yeni yaradıcılıq uğurları arzulayırıq!

Dünyaya göz açdığınız Kəlbəcərin Bağlıpəyə kəndi sizin doğma yurd-yuvanız, ömür yelkəninizdir. Hələ erkən yaşlarınızda sehrinə düşdüyünüz sazın-sözün cazibəsi orta məktəbdə oxuduğunuz illərdə sizin söz aləminə ilk addımlar atmağınızda mühüm rol oynayıb. Ağdabanlı şair Qurbanın, Dədə Şəmşirin, Qəmkeş Allahverdinin, Ənvər Rzanın... sənət sevgisi sizin də könlünüzü əfsunlayıb. Gəncədəki Dövlət Pedaqoji İnstitutunun (İndiki ADPU) filologiya fakültəsində oxuduğunuz illərdə yazdığınız şeirlərinizlə həm müəllimlərinizin, həm də tələbə dostlarınızın diqqətini cəlb etmisiniz. Həmin vaxtlarda qələmə aldığınız şeirlər Kəlbəcərdə çap olunan rayon qəzetində dərc edildikcə, ədəbi aləmdə imzanızı tanıtmmağa nail olmusunuz.

Ali təhsilinizi başa vurduqdan sonra əvvəlcə Kəlbəcərin Ağdaban kəndində ixtisasınız üzrə dil-ədəbiyyat müəllimi, 1968-1978-ci illər aralığında isə, rayonun Şorbulaq kənd orta məktəbinin direktoru vəzifəsində çalışmışınız.

1993-cü ilin aprel ayında bədnam qonşularımız Kəlbəcəri işğal edəndə, məcburi köçkün kimi Mingəçevirdə müvəqqəti olaraq məskunlaşmış və burada yenicə fəaliyyətə başlayan –saylı Kəlbəcər rayon köçkün orta məktəbinə uzun illər boyu rəhbərlik etmisiniz.

İlk gənclik illərinizdən etibarən doğma rayonunuzdakı qəzetin nəzdində yaradılan ədəbi məclisin ən fəal üzvlərindən biri, sonra da bir müddət onun rəhbəri olmusunuz. İstər həmin dövrlərdə yerli və mərkəzi qəzetlərdə, istərsə də müstəqillik illərində “Azərbaycan”, “Ulduz”, Mingəçevir leysanı”, “Bənövşə” jurnallarında, “Azərbaycan müəllimi”, “Mədəniyyət”, “Ədəbiyyat qəzeti”, “Ədalət”, “525-ci qəzet”, “Zaman”, “Yeni avaz”, “Səhifələr”... qəzetlərində və AYB-nin Mingəçevir bölməsinin xəttiylə nəşr ediən ədəbi almanaxlarda işıq üzü görən şeirləriniz oxucular tərəfindən maraqla qarşılanıb.

Siz 2007-ci ildən Azərbaycan Yazıçılar Birliyinin üzvü, indiyə qədər nəşr olunan “Ağlı-qaralı dünya”, “Dünya həmin dünyadır”, “Mürgülüyən qönçələr”, “Bir gecənin yuxusu” adlı şeir kitablarının müəllifisinuz.

Ulu ata yurdunuz Kəlbəcərin düşmən tapdağı altında qaldığı illərdə qələmə aldığınız şeirlərin böyük bir qismi zaman-zaman dədə-baba torpaqlarımıza göz dikən yadellilərə yönəlik nifrət hissiylə yoğrulsa da, əzəli torpaqlarımızın gec-tez azad ediləcəyinə ümidinizi heç vaxt itirməmisiniz!

Allaha şükürlər olsun ki, İkinci Qarabağ Müharibəsi sizin kimi yüz minlərlə yurd sevdalısının nisgilinə-həsrətinə son qoydu və ata ocağınız Kəlbəcərə gedən yollar üzünüzə açıldı! Bu tarixi Qələbədən sonra sizin illər boyu yazdığınız şeirlərdə iz salan yurd həsrətiniz indi nikbin notlarla əvəz olunmağa başladı.

Arzu edirik ki, bundan sonrakı vaxtlarda səsiniz-sorağınız yenidən Kəlbəcərdən gəlsin! Hörmətli qələm dostumuz 80 illik yubileyiniz mübarək!

GƏLİRƏM

Otuz illik bir həsrətin odunu,
Buz bulaqda soyutmağa gəlirəm.
Elsiz qalıb kədər çəkən gülləri
Yuxusundan oyatmağa gəlirəm

Uyuyaram, quşların nəğməsində,
Dincələrəm zirvələr kölgəsində.
Fikrə dalıb Tərtərimin səsində
Hələ yazıb-yaratmağa gəlirəm.

Görmək üçün o sonalı gölləri,
Haray çəkib çağırıram elləri.
Taleimə qismət olan illəri
Bir azca da uzatmağa gəlirəm.

Vətənimdə at oynadıb ötənin,
Yal-yamacda ittək ölüb-itənin,
Mən-mən deyib haray salan gədənin
Arxasınca daş atmağa gəlirəm.

Məhyəddinin oylağıdı o dağlar,
Fərqi yoxdur sərt qış ola, ya bahar.
Hələ çoxlu deyilməmiş sözüm var,
Ürəyimi boşaltmağa gəlirəm.
14.03.21

SARI

Ömrün payız fəsli tutub yaxamnan,
Aparır çovğuna, borana sarı.
Saçlarım ağarıb qar oldu bir-bir,
Biz də can artıq zamana sarı.

Dünyaya hər gələn bir cür yol seçir,
Kimi şərbət içir, kimi qəm içir.
Zaman ömrümüzün günlərin biçir,
Biz də can artırıq zamana sarı.

Sevdim Vətənimi, sevdim dünyanı,
Güllə qarşıladım hər gələn anı.
Xoşladım günəşi , acıq səmanı,
Heç vaxt üz tutmadım dumana sarı.

Qarşıda çox sorğu, çoxda sual var,
Mən nələr qazandım, məndən nə qalar?
Qəlbimin sevinci ellər-obalar
Gedirəm Allaha, anama sarı.

Vurğunu olmuşam təmiz saf eşqin,
Qəlbimdə olmayıb nə küdrət, nə kin.
Xalqını canıtək sevən Məhiyyəddin
Gedir “of “ deyilən bir ana sarı.
30. 06.2022

LAÇIN QAYASI

Başı ərşə çatan Murov dağının
Əziz balasıdı “Laçın qayası”.
Doğma Kəlbəcərin məğrur dayanan
Qeyrət qalasıdı, “Laçın qayası”.

O, bir yaraşıqdı dərəyə-düzə,
Baxdıqca zövq verir ürəyə, gözə.
Əzəldən vurğunuq bir-birimizə
Ana laylasıdı “Laçın qayası”.

Əynində boz rəngdə daş əbası var,
Ona sığal çəkir yağan yağışlar.
Döşündə yurd salıb havalı quşlar,
Laçın yuvasıdı “ Laçın qayası”.

Əzəldən vurğundu ona Məhyəddin,
Nəhs günlər keçirib bəlkədə min-min.
Üzbəüz dayanan doğma kəndimin
Nurlu aynasıdı, “Laçın qayası”.
10.09.2021