manera.az
manera.az

Barıt qoxuyurdu hərbi gödəkcəm.. - Müharibə şeirləri

Barıt qoxuyurdu hərbi gödəkcəm.. - Müharibə şeirləri
MANERA.AZ müharibə mövzusunda yazılmış çağdaş Azərbaycan şeirlərindən nümunələr təqdim edir:


Barıt qoxuyurdu hərbi gödəkcəm.. - Müharibə şeirləri

Süleyman ABDULLA:
Hərbi gödəkcə nağılı


O vaxt adamların çoxu mərd idi,
Sevməyə dost-doğma bir vətən vardı.
Kim idi ölümdən çəkinən,qorxan,
Çoxunun içində ulu Mən vardı.

Yaş olan payızda quruydu barıt,
Düşmənə atılan güllə şən idi.
O vaxt qiymətliydi söz də, əməl də,
Hər kəs dəyərinə yetişən idi.

Həkəri sahili şad idi onda,
Sopsoyuq suları qızartmırdı üz.
Güllə yağışına düşsə də tez-tez,
Axardı arxayın...Gecə və gündüz...

Geri qayıdırdı yollar bir axşam,
Boynuma sarılan xəbər gözəlmiş...
O vaxt çox gərəkdi Vətənə əsgər,
Sevindim...igidim dünyaya gəlmiş!

O gün havalar da xeyli soyuqdu,
Göydən narın-narın tökülürdü nəm.
Yolu yüyrək idi doğum evinin,
Barıt qoxuyurdu hərbi gödəkcəm.

Yorğun gözlərimdən sevinc yağırdı,
İlahi, boz çiskə çevrildi qara.
Qollarım yollandı dümağ qundağa,
Ciblərim yol oldu muştuluqlara.

Bakıya dönürdü səadət köçüm,
Qardan qorğanırdı özünü hamı.
Nə pulum qalmışdı, nə maşın vardı,
Hərbi gödəkcəmə bükdüm balamı.

Piyada yürüdük vağzala qədər,
Hərbi iş dediyin belə işdi dəə...
Təlaşla qundağı açıb yoxladıq,
Körpə puçur-puçur tərləmişdi də...

...Sonra illər keçdi o qarlı gündən,
O körpə böyüdü bir ərən oldu.
Böyüdü, boy atdı elə o ruhda,
Hərbi gödəkcəmlə boyu tən oldu.

Bağçası, məktəbi formada keçdi,
Ali məktəbi də bir parad kimi...
Ona çox yaraşdı əsgər paltarı,
Boyuna biçildi hərbi geyimi...

Hər səhər oyanıb işə gedəndə,
Canımda duyuram o qarı, sisi.
Hərbi geyiminə baxıb görürəm,
Gödəkcəm doludur Vətən sevgisi.

Sığmaz çantasına son xəritələr,
Bilir ki, bu sərhəd Vətənə dardır.
Gözaltı baxıram, gənc zabitimdə,
Köhnə kişilərin qüruru vardır.

Biz edə bilmədik torpağı Vətən,
Nə vaxtsa fələyin dönər təkəri.
Mənəm...gödəkcədi...xatirələrdi,
Arada yuxuma girir Həkəri.

Üz tutub gedirəm işığa sarı,
O vaxt ki, inamım pəjmürdə haldı.
Məni xatırlamaz hərbi gödəkcəm,
Daha ümidlərim oğluma qaldı.

Burda sona çatdı mənim nağılım,
Göydən alma deyil, ulduz düşür, - bax...
Çoxdan çıxarsam o gödəkcəni,
Mənim gödəkcəmdən çıxmaz o uşaq.



Barıt qoxuyurdu hərbi gödəkcəm.. - Müharibə şeirləri

Tofiq HƏSƏNLİ:
Səngərin gülü bitmədi


Gözəl, dur, çıx görüşünə,
Qapına bir qərib gəlib.
Səngərin gülü bitmədi,
Gülləsini dərib gəlib.

Baxma ki, əli soyuyub,
Ağır yol gəlib, uyuyub.
Köynəyini qanla yuyub,
Sinəsinə sərib gəlib.

Gözlərinə dolub getdi,
Məhəbbətin olub getdi.
Ürəyini alıb getdi,
Həyatını verib gəlib.

Vaxt yetdi, ara yaylığı,
Qoyubsan hara yaylığı?..
Dur bağla qara yaylığı,
Elçilərin durub gəlib.

Saxla ürək sözlərini,
Torpağa qoy dizlərini.
Öp doyunca gözlərini,
Qarabağı görüb gəlib!



Barıt qoxuyurdu hərbi gödəkcəm.. - Müharibə şeirləri

Mahir MEHDİ


***
... Dava onu da
xaraba qoymuşdu
güllə - güllə,
kəsib, montaj eləmişdi
onu da.
Sözü çəpləşəndə,
rəqibindən
əskik gəlirdi
bir yumruq, bir şillə.
Qolunun boşluğunu
gəzdirirdi hələ də
bahalı pencəyinin cibində...
Bir dəfə ayaqqabısı
onsuz qayıtdı evə,
qonşu uşağının qucağında -
xəbər gətirmişdi
saçlarını
təzəcə rəngləmiş
hamilə qadınına
küçəyə dağılmış adamdan...

Tural Adışirinin təqdimatındaБесплатные шаблоны для 10.5Forex Портал для чайников






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2020    »
 1234
567891011
12131415161718
19202122232425
262728293031