manera.az
manera.az

Sevgimizə yaxşı bax - Nigar Arifin şeirləri

Sevgimizə yaxşı bax - Nigar Arifin şeirləri
Manera.az Nigar Arifin şeirlərini təqdim edir:

Çətinki

Bir də bu yerlərdən keçməyəcəyəm,
Burda xatirələr boyumacandı.
İçib gözlərimdən ümidlərimi,
Yeyib ürəyimi doyanacandı.

Daha bu yolları tikan, kol basıb,
Keçən günlərimsə ayaqyalındı.
Sənli arzularım quru xəzəl tək,
Sənli xəyalların tozu qalındı.

Çətin ki, isinə canı bu yerin,
Ne qədər geyinsə çiçəyi-otu,
Bəlkə kimlərinsə ilk görüş yeri,
Bizim sevgimizin olar tabutu.

Bəlkə…

Bir az gözlərdən uzaq,
Bir az gözümdə dustaq,
Çırpınır arzuların,
Kəpənək qanadları…
Vərəqlərə atılır,
Könlümün söz atları…

Durnalar köçüb gedir
Köhnə diyarımızdan.
Yaş üstünə yaş gəlir,
Söylə,bizə nə qalır,
Küsən baharımızdan?

Hardasa düşüb itir,
Ayağından bir çarıq.
Kasıb ümidlərilə,
Gəzir hey aramızda,
Gəzir səfil ayrılıq…

Asılıb qəlbimizdən
Məhəbbətin bir ucu.
Parçalayır özünü,
Səbrin iti qılıncı.

Üşüyür məsafələr,
Günlər yağışda,qarda.
Geyin dualarımı,
Gələr yeni bahar da.

Sevgimizə yaxşı bax,
Qoyma bu eşqi darda.
Bəlkə bir də görüşdük,
Həyat adlı qatarda…

Barış

Özündən küsən adam,
Günahların çoxdumu?
İtirdiyin özünsən,
Qazandığın yoxdumu?

Kim səni aldı səndən?
Harda, necə unutdu?
Kim tutdu ürəyini,
Kim bu qədər ovutdu?

Kim çürütdü ömrünü,
Üzünə baxa-baxa?
Nələr qoydu gözündə,
Gözündən axa-axa?

Bəlkə, elə özünsən?
Özunə dərd olmusan.
Sevincini əlindən,
Bəlkə, özün salmısan?

Özünə dərd eləmə,
Dərdindən bezən adam,
Yollarından yorulub,
Fikrində gəzən adam.

Qayıt, yoluna qayıt,
Barış o küsdüyünlə.
Əlini ver, dur, görüş,
Əlini üzdüyünlə.

Ayrılıq qapısında

Heç bilmirəm harda bitdi,
sona yetdi sevgimiz.
Nə vaxt, necə hörüldü,
ayrılıq çələngimiz.

Bəlkə də lap əzəldən
görüşməli deyildik...
Doğrudanmı bir eşqə,
ya həvəsə əyildik?..

Bəlkə də uşaq idik
məhəbbətin əlində,
O əl ayırdı bizi...
Bəlkə də... bəlkə də yanılıram,
Biz özümüz böyütdük,
Elə bir-birimizi...

Bəs ayrılıq nə idi,
Ayrılıq nə imiş bəs?
Ayrılıq bir acı çay,
Ayrılıq zəhər imiş.
Hər gün yuxusuz gecə
yuxusunu tapanda,
Ayrılıq səhər imiş.
Oxuduğun kitabda
tapdığın bir incə söz,
bir ovuc qəhər imiş.
Ayrılıq zəhlətökən,
Ölümdən betər imiş...

Heç bilmirəm harda idi
ayrılığın qapısı.
Guya bilsəm nə olsun?
İndən belə nə mən dönən deyiləm,
Nə də ki sən o qapını açası...

Bəstəsi mən,sözü sən

Bir dənizə dönmüşəm,
Ləpəsi sətir-sətir.
Dalğaların altında,
Balıqlar yallı gedir.

Bir dənizə dönmüşəm,
Şeirimin sahilində.
Kövrəlib sərt qayalar,
Günəş tutur əlindən.

Bir dənizə dönmüşəm,
Göyün üzünə qaçır.
Gəmi boyda arzular,
Sinəmdə yelkən açır.

Bir dənizə dönmüşəm,
Dəniz bəbəklərində.
Çaxılıram daş-qaşa,
İncə biləklərində.

Bir dənizə dönmüşəm,
Saçları yosun-yosun.
Zaman dodaqlarında,
Dincəlir uzun-uzun.

Bir dənizə dönmüşəm,
Bu dənizin özü sən.
Oxuduğu nəğmənin,
Bəstəsi mən,sözü sən.

Yol

Görən, hansı dərzi yolumu biçib?
Ya yol təsadüfdü, ya mən naşıyam.
Bəlkə də, bu yolda sonuncu adam,
Bəlkə də, bu yolun məzar daşıyam.

Baxır arzularım pəncərəsindən,
Öz yolum dolaşır öz ayağıma.
Bilmirəm o yandan necə görünür,
Qismətim əl çalır yıxılmağıma.

Bəlkə, mən deyiləm bu gedən də heç,
Axsayan yolumdu, yolum sürünür.
Gah dönüb torpağa, gah dönüb daşa,
Gah düşüb arxamca mənə bürünür.

Haradan düşüb ki bəxtimə bu yol?
Bəlkə, ciblərimdən sürüşüb elə.
Üzünü-gözünü tapdalamışam,
İndi də üzümə qayıdır belə.

Təqdim etdi: Tural Adışirin
MANERA.AZ
Бесплатные шаблоны для 10.5Forex Портал для чайников






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2019    »
 1
2345678
9101112131415
16171819202122
23242526272829
3031