Manera.az Əbülfət Mədətoğlunun yeni şeirlərini təqdim edir:

GECİKMİŞ ETİRAF

Bir az gecikdim mən bu etirafda,
Amma gec olsada pıçıldayacam..
Mənə yer olmadı, heç bu ətrafda-
Torpağın altında puçurlayacam!

Sevgim artıq oldu, aşdı ölçünü-
O da ləçək-ləçək saraladı, qopdu...
Saxlaya bilmədim xəyal köçünü-
Onun da ruhuna "əlvida" hopdu!...

Atdığım addım da, dediyim söz də,
Döndü göz yaşına, döndü tənəyə...
Mənim içimdəki dözüm də, döz də-
Adım tək yük oldu dilə, çənəyə...

Gerçək olanları susub dinləmək,
Nə qədər çətindir- çəkənlər bilir...
Nədir öz içini didib- inləmək?-
Bunu da içindən çökənlər bilir.

Bir az gecikdim mən bu etirafda,
Batan gəmi kimi izim yuyulur,
Durub su axtarma heç bu ətrafda-
Kipriyimdən damır...üzüm yuyulur..

TƏKLİF

Ömür andı - gözümdə,
Sönür odum, közümdə,
Nəzərə al, dözümdə-
Məni gücündə saxla..

Üstümə çöküb bulut,
Onu hənirlə qurut...
Umut verib, sən umut-
Məni içində tağla..

Öz içinə sin, amma,
Məqamında din amma!
Ölən günü inanma -
Məni üçümdə ağla

DAĞLARIN

Ahım çatırmı görən
Qulağına , dağların?!
Ağlamaqdan kor olan-
Bulağına dağların...

Sürüşübmü yana qar ? -
Alışa qar , yana qar !..
Duasına gərək var -
Bu ağıla , dağların!

İllər qırış salıbmı
Verdiklərin alıbmı...
Ehtiyacı qalıbmı -
Bu nağıla , dağların?!

QARA KAĞIZ

hər bir ada yazılıb -
əl boyda - para kağız...
o da həm son məktubdu ,
həm də ki, Qara kağız !

orda vida notları -
orda ayrılıq yatır...
qəribədi son məktub -
Qara kağız tez çatır !

...təlaşlanma , deyəsən
qapı döyür poçtalyon..
istəmirəm döyəsən
dizlərinə... bu da son....

DƏRDİM

Tumurcuğu çırtlamış-
təzə dərdim - tər, dərdim!
Mən səni şehli-şehli-
təzə dərdim - tər dərdim!

Sarıldın sən də mənə...
eşq vardı səndə mənə!
Titrəmə, səndələmə-
sən də məni dər, dərdim!

Qarışaq sirdaş olaq
bir divar - bir daş olaq...
dərdlərə bir qaş olaq-
sən üstündə zər dərdim!

QARĞIŞ

Sizə ahımı göndərdim,
Dağlar, qarınız ərisin!
Yarınız ahımı çəksin-
Yansın, yarınız ərisin!..

Baxıb uzaqdan soluram
Dindən, imandan oluram...
Dərdlə o qədər doluram-
Daşsın, varınız ərisin!..

Nolar, mənə bir ip atın,
"Ümid yolu" qoyum adın...
Unuda bilmirəm dadın-
Dağlar, barınız ərisin!..


***
Dərdin dizinin dibində
Oturub fikrə dalmışam...
Elə bil yüz ildi burda-
Düşüb , bükülüb qalmışam...

Əlim nə Allaha çatır,
Nə də ünüm bəndəsinə...
Mən özümü son gücümlə -
Bənd etmişəm , bənd, səsinə...

Dərdin dizinin dibində
Yaşamaq istəyim heçdi...
Bir şair əli cibində-
Bir az əvvəl burdan keçdi...


***
Duyursanmı,ürəyim,
Qəfəsdə quş kimidi?!
Sonuncu nəfəs ilə-
Yerə düşmüş kimidi...

Duyursanmı, gözlərim
Öləziyir, kiçilir?!
Nurla dolu piyalə-
Səs-səmirsiz içilir...

Duyursanmı , əllərim
Barmaq-barmaq quruyur?!
Varlığım üzü sənə
Tək qurd kimi uluyur!..

Duyursanmı, bir sevgi
Payızına yıxılır?
Dinləmə məni, qəlbin
Duyuram ki, sıxılır!..


* * *
sən imkanın olanda
ya da ki, elə-belə -
qoy, telefo num səksənsin -
hərdən mənə zəng elə...

istəyirsən, danışma,
təki hənirin gəlsin.
mənə rişxənd edənlər
bir-birindən şəklənsin.

mənsə sıxıb köksümə,
o telefona “can!” deyim.
səninlə birlikdəyəm -
hər zaman, hər an, deyim.

bəlkə də çox gülüncdü
arzum da, əməlim də.
inan, varlığın durur,
sevgimin təməlində.


* * *
qaldım ortalıqda, fikrim qarışıq
nə qapım döyülür, nə də pəncərəm.
yuxum didərgindi, gözüm bulaşıq -
dərdlə döyüşdəyəm, qəmə səngərəm...

dağdan enən duman sıxır gözünü
çatdırıb, üstümə yıxır özünü.
məni tanıyanlar axır sözünü -
səbirlə saxlayır, dözür - mən gələm.

mənə doğma olan dərə-təpəni
yaxşı tanıyıram, həsrət çəkəni...
hər an görmək üçün ruhum öpəni -
ümidim çənədi, olub çən, gələm...

orada fərq varmış yerlə göy qədər
hamı eyham vurur - yanıram hədər.
hər gün sevəcəyəm, Məcnundan betər -
hər an cəhd edəcəm, sənə tən gələm!



* * *
Heç belə inciməzdim,
səni tanımasaydım.
ötüb, keçib gedərdim,
ya da bir “eh!” edərdim -
sənə inanmasaydım...

heç belə ağrımazdım,
könlümü verməsəydim.
arayıb-axtarmazdım,
səsləyib çağırmazdım -
əzəldən görməsəydim.

heç belə yaşamazdım,
mən səni sevməsəydim.
özümlə bacarmazdım,
bu qədər ucalmazdım -
sən məni sevməsəydin!


* * *
Gördüm ovcumun içitək
Gördüm bütünlüklə səni...
İçim qayğıyla doluydu -
Seçdim bu tünlükdə səni!

Bir-bir tanış cizgiləri,
Oxşadım, ovdum durmadan...
Mənə yad olan hisslərin -
Birin də üzə vurmadım!

Pərdəsin qaldırıb cismin
Ruhunun gözünə baxdım...
Kirpiyində damla idim -
Yanağın aşağı axdım...