“Bir daşla doqquz quş” layihəsində bu dəfə suallara araşdırmaçı Yalçın İslamzadə cavab verir.

-Niyə varsan?

- Növün davamı prinsipi yaşamaq instinkti ilə əlbirdir, mən də bir körpüyəm.

-Niyə yox olacaqsan?

- Mükəmməllik platonik uydurmadır, daimi mühərrik yoxdur, bütün makinaların, mürəkkəb sistemlərin bir ömrü var, yaşamağımız üçün vacib olan oksigen, uzun vədədə mitoxondrini sıradan çıxarır.

-Niyə yazırsan?

- Maraqları bölüşmək, oxşar maraqları onlanları tapmaq üçün.

- Yaşamaq nədir?

- Əvvəlcə məcburiyyət, sonra şüurlu seçimlər etmək.

- Ölüm nədir?

- Fərdi varlığın fərqində olan şüurun artıq olmaması.

- Ədalət nədir?

- İnsanın komplekslərindən, eqoist instinktlərindən, doğru düşünməsinə mane olan epistemolojik maneələrdən, stereotiplərdən, qrup psixologiyasından xilas olmuş azad ağılla etdiyi mühakimə.

- Azadlıq nədir?

- Açıq şüurla dərk etmək və istəmədiyini etməyə məcbur olmamaq.

- Yaradıcılıq nədir?

- Dünyaya estetik baxışın təzahürü.

- İnsan kimdir?

- Bioloji olaraq Hominid ailəsinin Homo Sapiens növüdür, Maslov piramidasına uyğun olaraq sırf bioloji varlıqdan, məsuliyyət duyan və özünü reallaşdıran insana çevrilmə potensialına sahibdir.

Tural İsmayılov,
MANERA.AZ