Bir dəli yağışdı, bir də ikimiz - Saqif Qaratorpağın şeirləri

Tarix:27-09-2018, 17:59 Baxış Sayı:226

Bir dəli yağışdı, bir də ikimiz - Saqif Qaratorpağın şeirləri
Manera.az Saqif Qaratorpağın şeirlərini təqdim edir:

***
Qaçırdı hamını göy gurultusu,
Çəkildi xəlvətə boz sərçələr də.
Bir dəli yağışdı,bir də ikimiz,
Gəzib dolaşırıq boş küçələrdə.

Bir ara əlindən çıxdı çətirin,
Az qaldı küləyə qoşulub gedə.
Bayaqdan dolaşır ayaqlarıma,
Bir pişik balası çıxıb döngədən.

Dağıdıb saçını söyüd ağlayır,
Çolaq dilənçinin boş qalıb yeri.
Yağış asta-asta yuyub aparır
Hisini-pasını qoca şəhərin...

Bir sevgi məktubu ilişib qalıb
Titrəyə-titrəyə bir gül koluna.
Sahildə üşüyən qoşa fidan şam
Girib bir-birinin yenə qoluna.

Axşam necə düşüb xəbərimiz yox,
Qara gözlərindən vaxt axıb gedir.
Bir azca üzünə soyuq baxanda,
Incik qonaq kimi eşq çıxıb gedir...

Gün günə bənzəməz,tale taleyə;
Bir ömür axtarsan tapılmaz itik.
“Sənə demədimmi qoşulma mənə...”
“ Çox gecdi...sonuncu qatar da getdi...”

...Bir də haçan yana sönən işıqlar?
Qurut ürəyimdə yaş əllərini.
Doldurub bir ovuc işıq da apar
Evə qayıdanda boş əllərini.


***
Payız da
bir bəhanədi,
kövrəlməyə,
darıxmağa;
payız gəldi deyə
başladı
şehli gözlərindən
çisək yağmağa.
Payız da
bir bəhanədi
ağlamağa...
Ötən günləri anmağa,
korun-korun yanmağa.
Payız da
bir bəhanədi
sənə nəsə demək üçün,
səni bir də sevmək üçün,
hərdən
küsüb getmək üçün,
hərdənbir də barışmağa...
Hardan tapdı
bu söz məni?
Xəbərim yox...
Neynim indi?!
Vallah,şeir yazmaq üçün
payız da
bir bəhanədi.



***
Hərdən mənasını
itirir hər şey,
ölüm də,olum da
gözümdən düşür.
Çıxır axırıma
bu xırdalıqlar.
Sıxır ürəyimi
bu xoş qılıqlar.
Bir şirin tərif də
ağrıdır məni...
Qaçmaq istəyirəm
özüm özümdən,
sığınıb içimdə
bir tənhalığa.
Buraxıb başını
şeirin-sənətin,
unudub keçmişi
bircə anlığa...
Unudub həsrəti,
unudub qəmi,
Aşırıb çiynimə
köhnə heybəmi,
çıxıb sonsuzluğa
gedən bir yola,
getmək istəyirəm...
Nə olar,olar...



***
Yenə əlin qoynunda,gözlərin pəncərədə,
Çəkib bitirə bilməz bir həsrətin rəsmini.
Mən də sənin rəsmini gözlərimdən asmışam,
Ürəyimin qanına qarışdırıb qəmini.

Fikrin dolaşıq düşər yolların ayrıcında,
Ürəyin qəribsəyər bir qərib üzdən ötrü.
Yellənər xəyalların bir çinar budağında,
Darıxarsan...bitərsən hər gün dənizdən ötrü...

Boylanarsan,baxarasan bir ömrün üfüqündən
Qum üstündə oynayan məsum uşaqlığına.
Çevirərsən sahili bir rəssam tablosuna,
Xatirələr şüşətək batdıqca ayağına.

Arzuların min ildi ağ yelkənli gəmidi,
Elə səni gözləyər bir qəlbin ümmanında.
İynənin ucu boyda bir işıq axtararsan
Azıb səhərə kimi bir eşqin dumanında...

O qədər baxarsan ki,pəncərə sahil olar,
Sevinib qışqırarsan “gör dəniz gəlib hara?!”
Hər gecə yuxusunda dəniz görən balıqtək
Atılarsan,özünü çırparsan dalğalara...



***
Daha təkcə özüməm bu qədim xarabada,
Bir də veyil küləkdi-buludları hürküdən.
Bir bənəvşə boylanır bir divarın çatından,
Bir də sınıq qapıdı...nə gələn var,nə gedən...

Unudulmuş adayam kainatın ovcunda,
Itirmişəm illərin sayını, hesabını.
Bu gündən başlayaraq gərək təzədən yazam
Köhnə-kürüş ömrümün sonuncu kitabını.

Ha axtardım hər yeri bir ağ varaq tapmadım,
Batıb baxt gəmisində zamanın sularına.
Yadımdan çıxır deyə,nə varsa bircə-bircə
Cızım tənha evimin boz,uçuq divarına.

Silinib yaddaşımdan,yoxdu bir xatirə də...
Hərdənbir xatırlayıb barı bir az kövrəlim.
His basmış bir çıraqdı nə zamandı ürəyim,
Hovxurub nəfəsiylə parıldadar kim silib?



***
Sən elə şeirsən ki ha yazsam da bitməzsən!
Ömrümün sonunacan havalı dolanaram.
Su deyib inildəyən bir çiçəkdən ötəri
Içimdən qırılaram,gözümdən bulanaram.

Damla-damla süzülüb,deşib daşı gələrəm,
Bir dəfə pıçıldayıb qırıq-qırıq “gəl”-desən.
Vecimə də almaram qışı,qarı,ayazı;
Qönçələnib gülərəm bircə yol gülümsəsən.

Misra-misra boy verər xəyalımda surətin,
Rəsmini gecə çəkib ürəyimdən asaram.
Dan yeritək qızaran gözlərimdə doğarsan,
Alın yazısı kimi hər gün səni yazaram...

Bilirsənmi,bənövşəm,ömrüm qara qələmdi,
Nə yaxşı sən çıxmısan qismətinə,bəxtinə.
Götürüb bircə söz yaz könlümün varağına,
Üşüyürəm...isinim əlinin istisinə.

AğstafaБесплатные шаблоны для 10.5Forex Портал для чайников


XƏBƏR LENTİ