manera.az
manera.az

Bir də sevmədiyim qadından ata oldum - ŞEİRLƏR

Bir də sevmədiyim qadından ata oldum - ŞEİRLƏR
MANERA.AZ Orxan Saffarinin şeirlərini təqdim edir:


İlahi, içimdən kimlər keçmədi?!
İlahi, bu ömrüm boşuna getdi.
Mənim bədbəxtliyim bir az da indi
O qızın xoşuna, xoşuna getdi.

Baxdılar, keçdilər, getdilər məndən,
Bir sınıq pəncərə, bir də göz oldum.
İlahi, bu ömrü düz yazmadın ki
Mən od olacaqdım, dönüb köz oldum.

Adam olacaqdım, bir az da insan,
Yaxşı olacaqdım, bir az da yaman.
Ay Allah, ay Allah, ay Allah aman
Mən axı nə üçün quru söz oldum?!

Mən dərdi eşidən, ağrı dinləyən,
Hamını ovcunun içində sevən...
Mən dərd danışanda, adamlar deyən:
Darıxma, düzələr, "bir az döz" oldum.


***
Sən də gedib özgə oldun mənimçün,
Sən də məndən düşdün elə aralı.
Daha əllərin də yoxdu əlimdə
Quruyub qollarım budaq misalı.

Quruyub əllərim, sınıb əllərim
Üzümə yansıyıb payız sarısı.
Elə üşürəm ki, qucağın üçün
Elə darıxıram, ay it balası
O çıxıb getdiyin uzağın üçün.

Bir az da, bir az da o körpə
Adımı qoyduğun uşağın üçün.

Darıxıram, darıxıram, başa düş
Necə edim, nətər edim bu halı?
Darıxıram gülüşünçün, səsinçün
Göz yaşı tökürəm hər gün səninçün
Oyuncaq itirmiş uşaq misalı.

Mən indi bir az da başqayam, başqa
Mən indi ölməyi dərd etmirəm ki
Hər gün öz içimdən küsüb gedirəm
Sənin yoxluğunu tərk etmirəm ki.

İlahi, ömrümə bir soyuq düşüb
Bir qış gecəsində sazaq misalı
Daha əllərin də yoxdu əlimdə
Quruyub qollarım budaq misalı.

Ağı əvəzi

Uşaq vaxtı atam evə gələndə
sevincək üstünə qaçardım,
qucaqlayardım.
Sonra böyüdükcə
atamdan qaçmağa başladım.

Sonra bir gün atam çıxıb getdi bizdən.
Qaçmaq nədi?
Getməyə yerim olmadı!

Nənəm hər gün babamın
şəkillərinə baxıb ağı deyirdi.
Anam
qardaşımın şəkillərinin tozunu alırdı,
Öpürdü, bağrına basırdı,
Ağlayırdı.

Bacıma atamdan on yaş kiçik adam
elçi gəlmişdi.
Bacım onda uşağıydı.
Hələ onda xoşbəxtlik,
Bizdən bir gəlinlik uzağıydı.
Anam hər gün
atamın köynəklərini ütüləyirdi.
Ütüləyirdi ki, üzünə düşən qırışlar
köynəyinə düşməsin.
Harasa gedəndə icazə alırdı şəkillərindən
Atamın qoxusu getmək bilmirdi,
Anamın əllərindən...

Sonra bir gün anamın saçları da ağardı,
Nənəm də olmadı sonralar,
Elə bacım da.

Bizə qalan şəkillərlə yaşamaq oldu.

Günlərin bir günü idi,
Anam döndü şəkil oldu...

Salam

Salam, xınalı quzum,
Salam, saçı hörüklüm,
Salam, gözünə baxıb
Sevincimdən öldüyüm!

Salam, əlləri yuxa,
Hissləri məxmər, qızım.
Salam, xoşbəxt sonluğum,
Əvvəli kədər qızım!

Salam, dodağı püstə,
Salam, çiçəyim, salam.
Üzünə doymadığım
Suyum, çörəyim, salam!

Salam, mənim gerçəyim,
Yalanım, gopum, salam.
Gəldim dizində öləm,
Məzarım, gorum, salam!

Salam, ay içim-çölüm,
Salam, mənim iç üzüm.
Daha gecdi, dur gedək
Mənim qaramsal özüm!

Mən uşaq olanda fərqliydi hər şey.

Nənəm babamla nərd oynayırdı,
biz oyunçu aparsın deyirdik.
Sonra bir gecə həyat adlı oyunun
oyunçusu apardı ikisini də.
Dinmədik...

Mən uşaq olanda fərqliydi hər şey.

Uşaqlıq dostlarımızla oynadığımız
silah oyununda,
heç cür vurduğumu sübut edə bilmədiyim,
ölməyən dostumu
bircə gülləyə erməni öldürdü
Kədərləndik...

Mən uşaq olanda fərqliydi hər şey.
Futbol oynaya bilmir,
ayağı top tutmur deyə,
oyuna buraxmadığımız oğlan,
müharibədə ayaqlarını itirdi
Yeridik...

Atamız gözümüzün qabağında
anamızı döyəndə,
ilk dəfə nifrət etməyi,
ilk dəfə daha çox sevməyi öyrəndik.
Sonradan ilk sevdiyimiz qadın,
başqasına ərə gedəndə
daha çox ağrı yaşadıq,
daha çox sevdik...

Sonra yavaş-yavaş böyüdüm.
Daha heç kimə
oyunçu aparsın demədim ki,
əcəl aparar birdən.
Məhlədə futbol, müharibə oyunu
oynayan uşaqlarla oynamadım ki,
ölərlər birdən.

Anamla atamın da şəklini
divardan yan-yana asdım,
amma qorxurdum ki,
dalaşarlar birdən.

Bir də sevmədiyim qadından ata oldum,
sevdiyim qadını düşünə-düşünə...


***
Məni bir gün öldürər
Bu sərsəri ağrılar.
Ani əzablarımdan
Sənə xoşbəxtlik doğar.

Məni bir gün öldürər,
Gecələr arzu tutmaq
Səhərəcən yatmayıb,
Səni də unutmamaq!

Məni bir gün öldürər,
Səni itirmək hissi
Bir də sənsiz yaşayıb,
Ölməməkdir ən pisi!

Məni bir gün öldürər,
Öldürər həyat, qızım.
Gözləri şabalıdı,
Saçları qıpqırmızım.


***
Mən əvvəllər elə bilirdim ki,
Babam Berlin divarlarını çiyni ilə yarıb.
Sonra bir gün əlində
əsasının əsdiyini gördüm

Qocalıb öldüm.

Mən əvvəllər elə bilirdim ki,
Nənəm xalçaları evimizə
sərmək üçün toxuyub
Sonra yenə bir gün ona büküldüyü gördüm,

Bükülüb öldüm.
Mən əvvəllər elə bilirdim ki,
Atam dünyanın ən güclüsüdü
Atam öldü...
Mən də öldüm.

Mən əvvəllər elə bilirdim ki,
Anam heç vaxt yemək yemir
Amma bir gecə,
qazanı necə sivirdiyini gördüm
Gördüm ki, yemir.

Sivrilib öldüm.
Mən əvvəllər elə bilirdim ki,
Böyük qardaşım həmişə yanımda olacaq.
Böyük qardaşımı öldürdülər.

Böyüyüb öldüm.

Sən gedəndən

Yaşanmadı, görülmədi ömrümün
Neçə ildə bircə dəfə ağ yeri.
Sən də getdin, bir andaca çökdü ha,
Sinəmdəki sürüşməyən dağ yeri!

Dəli oldum, küçələrdə qaldım e,
Sındı qəlbim, gözüməcən doldum e,
Sən gedəndən... sən gedəndən oldum e,
Mən bir az da adamların lağ yeri!

Səhər-axşam döydüm yazıq özümü,
Yığammadım yollarından gözümü.
Bacarmadım, söydüm, söydüm özümü,
Bədənimin qalmadı bir sağ yeri!


***
Uşaq ikən bir dəfə ayağıma mismar
batmışdı həyətdə oynayanda.
Bir ayağı olmayan müharibə əlili babam,
Əyilib ayaqlarımı qucaqlamışdı
həmin gün.

Köynəyinin bir qolu yay,
Bir qolu qış idi əmimin.
Soruşanda deməzdi heç vaxt,
necə olub qolu kəsiləndə

Deyərdi,
Bulud udub birini,
Allaha dua edəndə.

Mən uşaq ağlımla təsəllilər verərdim atama
Deyərdim ki,
Oxuyub böyük adam olacam,
Varlı olub səni saxlayacam.

Sevinərdim atam sevinəndə
Mən bir gün böyüdüm, amma....
Saxlaya bilmədim atamı gedəndə...

Atam aclıq və dərman preparatlarının
yoxluğundan dünyasını dəyişdi.
Həmin günü bacımla bir qutu dərman
atmışdıq sakitləşmək üçün...

/"Ədəbiyyat qəzeti"/

MANERA.AZБесплатные шаблоны для 10.5Forex Портал для чайников






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
TRİBUNA
XƏBƏR LENTİ
BÜTÜN XƏBƏRLƏR
TÜRK DÜNYASI
«     2024    »
 123
45678910
11121314151617
18192021222324
25262728293031